عیماد عەلی: ئەو خەڵکەی لە نەخۆشی کوردفۆبیا چارەسەر نابێت.
بەدوور لە رق و کینەی نێوخۆیی سەرکردە و لایەنە سیاسیەکانی کوردستان و بیرکردنەوەی تەسکی زۆر لە کاڵفام و فەریکە سیاسیەکانی خۆمان، بە چاوێکی کوردانەوە لە دیدی زۆرێک لەخەڵکی عیراق بۆ کورد و کوردستان بروانین، بەدوور لە ئاستی لاوازی و بەهێزی و بارودۆخی خودی و پێگە و باری سیاسی و ئابووری و کۆمەڵایەتیی ئەم وڵاتە، تا ئێستاش حکومەتی ناوەندی و زۆرینەی خەڵکەکەشی نەک بە عەقڵیەتی مرۆڤدۆستانە و هەرهیچ نەبێت وەکو گەلێکی نا ئاسایی خاوەن رابردوو و مێژووی ستەملێکراو و پر لە نەهامەتی تەماشای ناکەن، بەڵکو بیرو رەفتاریان لە ئاست سەرجەم مافەکانی کورد لە خانەی نەیاری سەرسەخت و تەنانەت دوژمنی ئەم نەتەوەیە دەرنەچووە. بۆچی؟
لە باری فەرمی و بەرژەوەندیە سیاسیەکان، لە ئاست کورد دا شیعە و سونەی عیراق جیاوازیان تەنها لەو کاتانەدا دەردەکەوێت کە ناکۆکن و هەر یەکە و لای خۆیەوە دەیەوێت کورد وەکو ملکەچ و دەستی راستی خۆی لەدژیی ئەویتر بەکاربێنێت (ئەوەی کێشەیە کە لە ئاست ژیان و باری کۆمەڵایەتیش لە رووی مامەڵەی فەرمی و نافەرمیەوە ئەوەندە جیاوازیان نیە و بیر و عەقڵی رەگەزپەرستی و خودپەرستیان گەیشتۆتە حاڵەتێک کە لە هەموو مافێکدا ئەوەی خۆیان بۆخۆیانە و ئەوەی کوردیش بۆ ئەوانە و دەیخۆن). ئا ئەمە لە هیچ شوێنێکی دونیا نابینیت تەنانەت لە هەرە دواکەوتوترین وڵاتانی جیهانیشدا.
پێکەوە ژیان و ئاشتەوایی و هاوڵاتیبوون و یەکسانی ماف و ئەرک، مافی هەموو لایەکە، بەڵام عیراق وەکو دەوڵەت و گەل و ئایین و مەزهەبیش هەر لە کاتی داگیرکاری و زەوتکردنی مافەکانی تا ئەمرٍۆش هەمیشە خۆی لە بەرزی و ئەویتری لە نزمی و بە دوژمن داناوە و تا ئەم ساتەوەختەش لەسەر هەمان شێوەی کلتوری دورگەی عەرەبی بەردەوام لە حاڵەتی بیری گوماناوی و زەتکردنی حەق و دەستبەسەرداگرتنی حاڵو ماڵی ئەویتردا دەژێت و ئەگەر دوژمنیشی نەبیت بۆ بەهێزکردن و یەکگرتویی خۆی، دوژمنێکی ئەگەر کارتۆنیش بووە بۆ خۆی دروست دەکات و بەردەوام چیرۆک و تۆمەتبار کردنی بە پیلانگێر یەکێکە لە سیفەتە سەرەکیەکانی و وەکو غەریزەیەکی بنەرٍەتی لە گیانیدایە و لە قۆناغی بیری قاتوقری و نەبوونی و وشکیی سەردەمی غەزو و داگیرکاریدا دەرنەچووە.
تۆ وەرە تەماشای عیراقی ناوەندی دەسەڵاتی ئەمرٍۆ بە فیعلی و مامەڵە و رەفتاردا بکە، نەک بە قسەی زل و وەسف و مەدحی کاتی لاوازیان، لە هیچ کاتێکدا باسیان لە مافە سەرەتاییەکانی گەلی کوردیان نەکردووە، نەک مافیی تەواوەتی وەکو هاوڵاتیەکی ئەم نیشتمانەیان زانیبێت. قەت لە کاتی ئاساییدا بیرو فکر و رۆشنبیریان نەگەیشتۆتە ئەو ئاستەی جگە لە خودی خۆیان میلەتێکی تر وەکو هاوبەش لەقەڵەم بدەن و مافەکانی زەوت نەکەن. ئا لەم سەردەمەدا هەمووان یەکلایی نەبونەتەوە لەوەی کە عیراق نابێتە وڵاتێکی هاوبەشی خەڵکەکەی و مافی هیچ لایەکی دیکە بە رەوانابینرێت و بۆی بکرێت لە ستەم لە ئەویتر وەکو ژێردەستەو پلە دوو قسورناکات.
ئەم قسانە لای هەمووان زانراوەو تەنها بۆ بیرهێنانەوەیە، ئەوەی سەرسورهێنەرە و پێویستە بوترێت لەم کاتەدا گەلی عەرەبی عیراق بەدەر لە گۆڕانکاری و پێشکەوتنەکانی جیهان و ناوچەکە مامەڵە دەکات و داوای ئەوەش لەگەلی کورد دەکات کە وەکو خۆیان بمێننەوە و بە راستەوخۆ یان ناراستەخۆش بووە هەرەشەی دووبارە تێکدان و لێکدابران و کیمیایی و جینوساید و دەربەدەر کردنی کورد دەکات و رۆژ نیە ئەوە نەسەلمێنێت کە ئەگەر لەدەستی بێت زەرەیەک مافی کورد نادات. باشترین نمونە تەماشای راو هەلوێستی کاربەدەستانی عیراق لەمەر پرسە گرنگە وابەستەکەی کوردەوە بکەن لەم کاتەدا، هەر شتێک بۆ بەرزراگرتنی و باڵای مانەوەی ئەوان بێت یان دەستور پێشێل دەکەن یان ئەگەر پێچەوانە بۆ ئەوان باش بێت پابەندبوونی دەستور دەکەنە بەهانە. بچوکترین نمونەی دووفاقیانەی سیاسی و ئابووری بەکارهێنانی بریارەکانی دادگای فیدراڵی لە لایەکەوە و پێچەوانەی ئەوەش ئەو هەزار قوتابخانەیە کە نەک خۆی بەڵکو وڵاتی چین بۆی بنیات دەنێت، هەرێمی کوردستانی لێ بێبەش دەکات، تەماشای ناردنی 200ملیارەکە بکە کە لە کاتی کەوتن و لاوازی و قۆناغی پاراستنی بەرژەوەندی لایەنێکی سیاسیدا دەینێرێت و بۆ رۆژی دوایی لە گۆرٍینی هاوکێشە سیاسیە نێوخۆیەکە نەک ناینێرێت بەڵکو بەهانە بۆ برٍین و زیاتر فشار کردن بۆ تێکدانی وەزعی کوردستان دەدات و چاوی بە زۆرشتی لاوەکی ئاسایی واقعی ئابووری و ئارامی کوردستان هەڵنایەت، تاکە سیاسەتمەدارێک نابینیت کە بە کردەوە کورد بە نەیار و دوژمنی خۆی و گەلەکەی نەزانێت، ئەگەر بە ئاشکرا باسی ئەوەش نەکات یان بۆ فرتوفێڵ پێچەوانەکەی باس نەکات.
تۆیەکی کورد بەدوور لە دیدی خۆت بۆ ئەم حزبە گەندەڵ و سەرکردە بێفەرانە، رۆژانە ئەم رەفتارانە دەبینیت و لە ململانێی سیاسی لەگەڵ براکەتدا دەگەیتە ئێسک شکاندن، بۆچی یەکجار بە عەقڵ بیرناکەیتەوە و قوربانیەکی سیاسی بچوک نادەیت. با دەسەلاتی جوت حزب و بنەماڵە بە وردی تەماشای هەڵویِستی سەرجەم کەس و لایەنەکانی عیراق بکەن و دوژمنی خۆیان لە پێش برای هاوخوێن و رەگەزی خۆیان بناسن. با باش بزانن کاتەکە زۆری بەسەرچووە و هیچ بوارێکی ئەوتۆ نەماوە و لەدواجاردا پەنجەی پەشیمانی دەگەزن و کەس دادیان نادات.
