عیماد عەلی: دو بنەماڵەکەی کوردستان جەوهەری حزبایەتیان شێوان.
ئەگەر لە حاڵەتێکی ئاساییدا بین و بە شێوەیەکی سانا و ئاسان لە بارودۆخێکی هەمەجۆری هاوشێوەی کوردستان بدوێین نەک وڵاتێکی دیکە. حزب وەک چەمکێکی مۆدێرن و رێکخراوی سەردەمیانە، زۆر جار لە قۆناغێکدا دروستدەبێت کەجەوهەر و روکەشی ژیانی خەڵک تا رادەیەکی باش لە حاڵەتی راگوزەر و لادانێکی جیاواز لە وەی پێش خۆیدا بێت. دروستبونی حزب، لە دەرئەنجامی کاریگەریی کۆمەڵە کارلێکێک لە سەر بارودۆخی هەمەجۆری سیاسی، کۆمەڵایەتی، ئابووریی و، گۆرٍانکاریی خودی و بابەتی تەنانەت لە رووی چۆنێتی ژیانی گەلیشەوە دروست دەبێت. بە پێگەیشتنی زەمینەکە هەوڵی نەهێشتنی بارودۆخی باو دێتە ئاراوەو، رەوشی نوێی جیاواز خۆی فەرز دەکات، لەوێدا بزوتنەوەیەکی جیاواز لە نێو رەوتی سیاسی خەڵکدا دروست دەبێت. سەرئەنجام گردبونەوەی کۆمەڵێکی پشتبەستوو بە رێباز و شیعار و بنەمای سەرەکی تایبەت دروستبدەبێت. واتە رەوشێکی سیاسی کۆمەڵایەتی ئابووری نوێ دێتە ئاراوە کە لە قۆناغی هەنوکەیی خۆی جیاواز و پێشکەوتربێت و پێشەنگی ژیانی پێشکەوتوانەی سەردەمیانە بێت لە چاو ئەوەی هەبووە.
بە پشتبەستن بەو فاکتەرانەی دروستبونی حزب و چۆنێتی کارکردنی، بۆمان دەردەکەوێت کە ئەمەی ئێستای کوردستان هەیە نەگەیشتۆتە رۆخی قۆناغی دامەزراندنی حزبی راستەقینە. ئەوەی هەیە بەناوی حزبەوە رێکخستنێکی پەرشوبڵاوی بنەماڵە و کۆمەڵێک هاوبەرژەوەندخوازن و بەدوور لە سەرجەم مەرجەکانی بەرێوەچونی کاروباری حزب، پێداویستیەکانی ژیانی تایبەتی خۆیان مەیسەر دەکەن، تەنانەت بەقەد کۆمپانیایەکی بچوکیش قازانجی کورتمەودا و دوور مەودایان بۆ رەوتی ئاسایی، سیاسی، کۆمەڵایەتی، ئابووری، رۆشنبیریی ژیانی خەڵک نیە.
بنەماڵە و کەس و خێزان و کۆمەڵێک خزم لە مەرجەکانی بوونی حزب تێنەگەیشتبن و سەرجەم مەرجەکانی حزبایەتی بکەنە قوربانی خۆیان و زەمینەسازی دروستکردن و بەرێوەچونی حزب تێکبدەن و بنەما و رێباز و شیعاری گونجاو لە کیسەی هیچ عەتارێکی ئەو خەڵکە نەبێت، ئا ئەمە ناوی دەنێیت چی.
باس و خواس و کفتوگۆ و مشتومرٍ و تیۆریزەکردن و توێژینەوە لە بارەگایەکی هاوشێوەی چایخانە و تەنها لەسەر برٍی قازانجی مادی و شێوەی بەدەستهێنانی سەروەت و سامان و موڵک و ماڵ و پۆست و دەسەڵات زیاتر هیچیتر نەبێت، بەڵکو هەموو هەوڵێک بۆ چۆنێتی بەدەستهێنانی ئەو قازانجانە بەدوور لەویتری رکابەر بێت، تاوەکو تەنها داهاتیان لە زۆری بدات، نەوەکو خەڵکە وابەستە بەرژەوەنخوازەکەی دەوروبەریان لە کەمی بدات.
حزب بەخۆی ئەم کارانە بکات:
* دەست بەسەر پارە و داهات و ماڵ و موڵکی گشتیدا بگرێت.
* تەمویلی حکومەت بکات نەک بە پێچەوانەوە.
* قۆرخی بازرگانی بەهەموو شێوەیەکیەوە بکات و بازار بخاتە ژێر رکێفی خۆی و دارودەستەکەیەوە.
* بە ئارەزووی خۆی و بە پێی بەرژەوەندیەکانی دەست بگرێت بەسەر پەیوەندیەکانی دەرەوەدا.
* پاراستنی ئاسایشی نێوحۆ و سنوری ولاتەکە بەدەستی ئەو بێت.
* چەک و تەقەمەنی و باری سەربازی لە ژێر رکێفی ئەودا بێت.
* دادگا و دادوەری سەر بەو بن نەک حکومەت.
* حکومەت فەلسەفەی بەرێوەبردنی نەبێت و تەماشای دەستی حزب بکات.
* کاروباری پەروەردە و فێرکردن رایی بکات.
* بەرپرسی حزبی بەرپرسی بەرپرسی حکومی بێت.
ئا ئەمە دەکرێت و دەشێت ناوی بنێیت حزب، بەڵێ ئەمە گەر گردبونەوەی بنەماڵەیی و خزمخزمێنە و تەنها پاراستنی کۆمەڵێک خەڵک نەبێت هیچ ناوێک هەڵناگرێت و حەق نیە لافوگەزاف بە چەمکی پیرۆزی حزبی راستەقینەوە بدەن.
لە لایەکەوە هیچ مەرجێکی حزبیت لە خۆت هەڵنەگرتبێت، لە لایەکی تریشەوە بێبەش بیت لە کەسێکی کاریزما هەر نەبێت بۆ کۆکردنەوەی خزمان و هەروەها خاوەنی هیچ بنەمایەکی سەرەکی حزبایەتی لە پێکهاتەکەت نەبیت و تەنها پۆست و پارە و هیزی چەکدارت هەبێت، راستە ناوی خۆت بنێیت حزب؟!
لە کۆتاییدا با ئەوەش بڵێم. ئەم بەیانیە پیاوێکی پیری کەنەفتم بینی بە گۆچانێکەوە دەرۆیشت، پێی وتم: وەرە کورٍم با ئەو خەڵکە تەنها ئەوەیان بەگوێدا بدات و بڵێت؛ بۆ کوێی دەبەن صەدام نەیبرد.
