شــوان خــورشید: دۆخی عێراق بەرەو کوێ؟
دوای ئەوەی سەدر هەموو کارتەکانی سوتان و بە ئامانجەکانی نەگەیشت، وەک دەست لە کشانەوی کوتلەکەی لە پەرلەمان و، جوڵاندی شەقام و، چونە نێو حەرەمی پەرلەمان و، هەڕەشەکردن لە دادگای فیدڕاڵی، تا بڕیاری هەڵوەشاندنەوەی پەڕلەمان بدەن، بەڵام پێچەوانەکەیان وەرگرتەوە، هەموو ئەو کارتانەی لە دەسی ڕەوتی سەدر بون سوتان و، هیچیان لێ سەوز نەبوون. بۆیە سەدر داواکاریەکی تری هەبوو کە هیچ مەنتق نەبوو بەوەی هەموو سیاسیەکانی عێراق بە سەدریشەوە لە پرۆسەی سیاسی بکشێنەوەو، حکومەتێک دامەزرێت بونی هیچ لەو کارەکتەرانەی تیا نەبێت کە لە دوای ڕوخانی بەعسەوە، لە دەسەڵاتی عێراق بونیان هەبوە، ئەم کارتەش زۆر لاوازو، تەنانەت جێگای بیر لێکردنەوەش نەبوو، بۆیە دواجار موقتەدا سەدر بە بڕیارێک وازهێنانی خۆی لە پرۆسەی سیاسی عێراق ڕاگەیاندو، هەموو دامودەزگاکانی سەر بە ڕەوتەکەشی داخست. بەڵام لێرەدا نهێنی پشت بڕیارەکەی تا بڵێی ئاڵۆزە، ڕاستە بڕیاری دوور کەوتنەوەی و دەست بەرداربونی خۆی لە کاری سیاسی ڕاگەیاند، کە ئەمە شەشەمین جارە ئەو کارە دەکات و، جارێکی تر تێهەڵدەچێتەوە.
لە ڕاستی دا سەدر وازهێنانی خۆی ڕاگەیان، بەڵام بە هەوادارانی ڕەوتەکەی نەوت، دەسبەرداری خۆپیشاندان بن، تەنانەت شەقام لە خۆپیشاندانەوە،گۆڕا بەرەو توندو تیژی و هەڵکوتانە سەر ناوچەی سەوزوو زۆربەی دەزگا فەرمیەکانی دەوڵەت، لە لایەک مان لە خواردن و خواردنەوە دەگرێت و داوای هێور کردنەوەی بارودۆخ دەکات، لەلایەکی ترەوە وەسێت دەکات بە مردن و کوژرانی گەردنی ئازاد بکەن، کە ئەمە خۆی لە خۆی دا، مانای ئەوەیە چ گۆبەندێکی لە دوای خۆی ناوەتەوە،چونکە ئەگەر سەدر نیازی باش ببوایەو، لەگەڵ وازهێنانی لە پڕۆسەی سیاسی عێراق، بە تویتێکیش بارودۆخەکەی هێور ئەکردەوە،بەڵام ئەوە نیە کە بیری لێ ئەکرێتەوە، بۆیە دەبینین دوا کارتی موقتەدا، ئاڵۆزکردنی یەکجاری عێراقەو، لەم ڕێگایەوە دەیەوێت زیاتر بە مەرامەکانی بگات.
ڕەنگە خەویش بەوەوە ببینێت،گەلانی عێراق و مەرجەعیەت، بۆ هێورکردنەوەی بارودۆخەکە، تەشریف بەرنە حەنانەو، بچنە ژێر باڵیەوەو، بە شێوەی ئیمام خومەینی، سینی زێڕینی دەسەڵاتی پێشکەش بکەن، وەک ڕوحانیەک ناو ناوبانگی بۆ هەتا هەتایە لە داهاتوی عێراق دا بمێنێتەوە، جا ئەوەی ئێستا عێراق تێی کەوتوە، مەترسیەکی گەورەیە لەسەر پرۆسەی سیاسی، کە پێ دەچێت وەک چۆن لە کۆنتڕۆڵ دەرچوە، خراپتریش بێت و توندو تیژی بگاتە ئاستێک، چارەسەر بونی ئەستەم بێت، بەڵام ئەوەی دەمینێتەوە، تموحی گرتنە دەستی دەسەڵاتە نەک خزمەت کردن بە عێراق و گەلی عێراق. لەو نێوەندەش دا تەنها گەلانی عێراق زەرەرمەندی یەکەم و کۆتا دەبن.
هەر یەک لە سەدرو سەرکردەکانی چوارچێوەی هەماهەنگی، بە ساغ و سەلامەتی لێی دەرباز دەبن و ، شەقامەکانیش بە خۆێنی هەژارو برسی و نەدارەکانی خەڵکی عێراق گوڵڕەنگ دەبن، پێش دەچێت بارودۆخە لە جیاتی هێوربونەوە، زیاتر ئاڵۆز بێت، مەگەر بە دەس تێ وەردانی دەرەکی، دۆخەکە کۆنتڕۆڵ بکرێت،گەر نا، توڕەیی خەڵک و نابەرپرسیارێتی دەسەڵاتدارانی عێراق لە ئاستێک دایە، بەرژەوەندی خۆیان خستۆتە سەرو هەموو گەلی عێراق و سەروەری ووڵات،کارێکی وایان کردوە زۆر ئەستەمە بتوانرێت، بارودۆخی ئاڵۆزی عێراق هێور بکەنەوە، چونکە دوو بژاردە بونی هەیە، یەکەم هێورکردنەوەی بارودۆخەکەو، دامەزراندنی حکومەت و داڕشتنەوەی دامو دەزگاکانی،کە ئەمە ئەستەمە بەو فۆڕمەی کە هەیە بێتە دێ، بژاردەی دووەم زۆر نزیکە، دروست بونی شەڕی ناوخۆو،کەوتنە وێزەی یەکتری کوشت و بڕ، وەک یەمەن و لیبیا،کە بژاردەی شەڕی ناوخۆ زۆر نزیکە و عێراق ئەبێت بەو قوناغەدا تێپەڕێت و، نیشانەکانیش دەرکەوتون.
