عه‌بدوڵا که‌ریم محمود: ئارام ی سەرکردە/ بەشی چوارەم.

عەبدوڵا کەریم مەحمود

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

تراژیدیای مه‌رگی ته‌م و مژاویی ئه‌مین جه‌لال، به‌ شیوه‌یه‌کی تایبه‌تی و گشتی کاریکرده‌ سه‌ر هه‌موو ئه‌ندامانی خانه‌واده‌و بنه‌ماڵه‌و خه‌ڵكی شاری سلێمانی و سه‌راپا نیشتمان. به‌ڵام ئه‌و کارەساتە به‌شێوه‌یه‌کی تایبه‌تی سوێی ئازارێکی زۆر توندبوو، به‌ناخی هێمن و بێ ده‌نگی و هه‌ست و‌ سۆزی ئارام دا شۆڕبووه‌وه‌.
دایک و باوکی ئه‌مین و هه‌موو خانه‌واده‌که‌یان تەنیا هیواو ئاواتێکیان ئه‌وه‌ بوو ( شاسوار ئه‌مین) له‌ مۆسکۆ و یه‌کێتی سۆڤیه‌ت ون نه‌بێت، شاسوار له‌گه‌ل خاتوو( لیدیا ئیڤاتۆڤنا )ی دایکیدا بگه‌ڕێنه‌وه‌، له‌ باوه‌شی سۆزی پڕ له‌ میهربانی خانه‌واده‌که‌یاندا په‌روه‌رده‌ی بکه‌ن. له‌ مانگی ته‌موزی 1968 ته‌ها جه‌لال ی برای ئه‌مین، سه‌ردانی شاسوار ‌و لیدیا ئیڤاتۆڤنای له‌ مۆسکۆی کرد.
ئارام له‌ ساڵی 1964 -1965له‌ کۆلێژی ئه‌ندازیاری زانکۆی به‌غداد وه‌رگیرا، له‌ به‌ر کزیی چاوه‌کانی نه‌یتوانی له‌و کۆلێژه‌ بخوێنێت، ئه‌وساڵه‌ ده‌ست به‌رداریی خوێندن بوو.
له‌ساڵی 1965- 1966 ئارام له‌ کۆلێجی بازرگانی له‌ زانکۆی به‌غداد وه‌رگیرا، به‌رده‌وام بوو له‌سه‌ر خوێندن، ساڵی 1969 ئارام به‌ بۆنه‌ی کۆچی دوایی ئه‌مین-ی برایه‌وه‌ سه‌ردانی مۆسکۆی کرد، له‌ ساڵی 1969 -1970 ئارام کۆلێجی بازرگانی به‌ پله‌یه‌کی زۆر باش ته‌واو کرد. بڕوانامه‌ی بکالۆریۆسی وه‌رگرت و له‌ به‌غداد مایه‌وه‌.
ئارام له‌ ته‌مه‌نی منداڵییه‌وه‌ ببوو به‌ هاوڕێی رۆژنامه‌و کتێب، به‌ به‌رده‌وامی سه‌رقاڵی خوێندنه‌وه‌ بوو، ئاستی رۆشنبیری زۆ باش بوو، له‌ قۆناغی ناوه‌ندی و ئاماده‌ییدا له‌ ریزه‌کانی یه‌کێتی قوتابیانی کوردستان و پارتی دا کاریی کرد بوو.
له‌ ساڵی 1964 که‌ باڵی مه‌کته‌بی سیاسی و باڵی مه‌لامسته‌فا له‌ پارتی جیابوونه‌وه‌، ئارام سه‌ر به‌باڵی مه‌کته‌بی سیاسی بوو، له‌ساڵی 1965که‌ خوێندکاری زانکۆ بوو له‌ به‌غداد، هه‌ڵبژێرا به‌ ئه‌ندامی سکرتاریه‌تی یه‌کێتی قوتابیانی کوردستان.
ئارام لەبه‌ر زیره‌کی و ئاستی قوڵی رۆشنبیری له‌ چه‌ندان کۆنفرانس و کۆنگره‌ی رێکخراوه‌یی و حیزبی، وه‌ک ئه‌ندام – به‌شداریی کردووه‌، وه‌ک کۆنگره‌کانی یه‌کێتی قوتابیانی کوردستان و یه‌کێتی نیشتیمانی قوتابیانی عێراق و یه‌کێتی لاوانی دیموکراتی کوردستان.
له‌و کۆنگرانه‌دا وه‌کو کادرێکی به‌توانای خاوه‌ن فکری سیاسی خاوه‌ن ڕاوو و بۆچونی دیارو تایبه‌تمه‌ندی خۆی بوو، له‌ سه‌ر زۆر له‌ رووداو باسه‌کان، راو بۆچونی لۆژیکانه‌ی خۆی هه‌بووه.
ئارام به‌ هیچ جۆرێک، هیچ جۆره‌ سازشێکی نه‌کردووه‌، به‌و په‌ڕی توانایەوه‌ به‌ زمانێکی دبلۆماسییانه‌ی لۆژیک و به‌هێزه‌وه‌، هه‌موو ئه‌و خاڵه‌ ستراتیژانه‌ی که‌ پێویست بوو، بە جورئەتەوە به‌ زمانێکی پاراو دەیخستە روو.
له‌ ساڵی 1969 له‌ کۆنگره‌ی یه‌کێتی قوتابیانی عێراقدا به‌شداریکرد له‌سه‌ر به‌دیهێنانی خواست و ماف. خه‌ونی یه‌کێتی قوتابیانی کوردستان، له‌ناو هۆڵی کۆنگره‌دا رووبه‌رووی سه‌رانی حیزبی به‌عس، له‌یه‌کێتی نیشتیمانی قوتابیانی عێراق وه‌ستایه‌وه‌. له‌ گه‌ڵ هاوڕێکانیدا له‌ نوێنه‌رانی قوتابیانی کوردستان، له‌ کۆنگره‌ کشانه‌وه‌ و هۆڵه‌که‌یان به‌جێهێشت.

سه‌رچاوه‌:
1- دیدارێک له‌ گه‌ڵ وه‌زیره‌خان ی خوشکی شه‌هید ئارام ی سه‌رکرده‌ له‌ سلێمانی.
2- نوسین و ئاماده‌کردنی محه‌مه‌د شێخ عه‌بدولکه‌ریم سۆڵه‌یی، ئارام و بزوتنه‌وه‌ی شۆڕشگێڕی کورد، ب1، 2007، چاپخانه‌ی کارۆ.