نوری کەریم: ئەمەریکاو تورکیا، یاری پشیلەو مشک – بەشی دووەم.
ریککەوتنەکەی (ئەستانە)ی 1998 لەنێوان رۆسیا و تورکیاو هەڵوێستی ئەمەریکا، وەک پڕکەرەوەی ناو چەیەکی ئارام لەنێوان تورکیاو سوریادا و پاراستنی یەکپارچەیی خاکی سوریا وئاسایشی نەتەوەیی تورکیا، کە هەردو ئامانجەکە دژی خواستەکانی گەلی کوردە لە رۆژاوای کوردستان. وڵاتانی ئەوروپاش بەشێوەیەکی گشتی سەرگەرمی پڕکردنەوەی ئەو بۆشاییەی نێوان سوریاو تورکیا نین، تورکیاش دەیەوێت بەتیرێک دو نیشان بپێکێت، 3.5 ملیۆن ئاوارەوپەنابەری سوریا لەکۆڵ خۆی بکاتەوەو لەو روبەرانەی خاکی رۆژاوادا نیشتەجێیان بکات و وەک میلیشیاو سیخوڕیش دژی کورد بەکاریانبهێنێت، هەنگاو بەهەنگاویش دیمۆگرافیای رۆژاوای کوردستان بگۆڕیت. وەزیری دەرەوەی دانیمارک ئەو سڵەمینەوەو دڵەڕاوکەیەیەی ئەورۆپا بەرامبەر بەتورکیا، هانیدا بەئاشکراو بێپەردە و بەئامادەبونی وەزیری دەرەوەی تورکیا کارێکی بە تورکیاکرد لە مێژودا کەموێنەیە و وتی: تورکیا دەوڵەتێکی تاوانکار و ئەردۆگانی سەرکۆماریش وەک تاوانکارێکی جەنگ تاوانبارە و پێویستە دەست لە سوریا هەڵبگرێت. ئینجا وتی تورکیا هەڕەشەی پچڕاندنی پەیوەندییەکان دەکەن لەگەڵماندا، فەرمون بیکەن و دوملیۆن و سێ صەد هەزار هاوڵاتیتان لێرەیە بیانکێشنەوە. نوێنەرەکەی تورک بەجۆرێک شپرزەبو، ئەو ئینگلیزییەی دەیزانی فریای نەکەوت و هەر بەزمانی تورکی کەوتە جنێودانی بازاڕی و دیوی ناوەوەو راستینەی تورکە رەگەزپەرستەکانی بۆ هەموان دەرخست.
ئەمەریکا بە2000 سەربازەوە لە سوریا دامەزراون و هەفتەی رابوردوش ژمارەی سەربازەکانیان بەڕێژەی ٪35 پترکرد، هێزێکیشیان لە سێکوچکەی سنوری نێوان عێراق، ئەردەن و سوریا لە باشوری رۆژهەڵاتی سوریا جێگیرکردووە لە بنکەی سەربازیی (نەتەف) و دەتوانێت رێگای هاوکارییەکانی ئێران بۆ حکومەتی سوریا و میلیشیا شیعەکان و حیزبوڵلای لوبنانی ببەستێت، لەئایندەشدا پرۆژەکەی کۆماری ئیسلامی ئێران لەکاربخات یا هەر بەتەواوەتی پوچەلیبکاتەوە .(بۆلتن)ی راوێژکاری پێشۆی ئاسایشی نەتەوەیی ئەمەریکا، بەپێی پلانێک وڵاتی سوریا دابەشدەکات و لایەنەکانی ئەو کێشەیەش: تورکیاو کوردی روژاواو دورنییە باکوریش لەسەر حسابی ئێران بێنێتە سەر مێزی دانوستاندن. بۆلتن دەیەوێت ئابڵوقەیەکی خنکێنەر بەسەر ئێراندا بسەپێنێت و پلە بە پلە و هەنگاو بەهەنگاو و قۆناغ بە قۆناغیش سزاکانی لەسەر قورس بکات و ئەوەندەی بگونجێت ئۆپۆزیسیۆن لەناوەو دەرەوەی ئێران ببزوێنن هەتا بارودۆخێکی گونجاو دێتە پێشەوە وبە پێشدەستی ئیسرائیل گورزێکی کوشندەی تێسرەوێنن ببێتە هۆی روخاندنی رژێمی مەلاکان و گۆڕانکاریی لە رژێمەکەی ئەردۆگانیشدا بکەن. هەر لەودەمەوەش تورکیا ئاگادارکرا، هێزە بەکرێگیراوەکانی (نوسرە) لە ئەدلیب بکێشێتەوە. خوێنەری ئازیز ئەگەر بەوردی و سەلیقەوە لە روداو و پێشهاتەکان وردبێتەوە هەستدەکات ئامانجەکانی ئەمەریکا، روسیا، تورکیا لەهەندێک وێستگەدا یەکدەگرنەوەو لەهەندێکیشدا ناجۆرو ناکۆکن و ئەگەری پێکدادانی سەربازیشی لێدەکرێت. ئامانجی سەرەکی ئەمەریکا لە سوریا و بەتایبەتیش لە رۆژهەڵاتی وڵاتەکە(رۆژهەڵاتی کوردستان) بریتییە لە
1- دەستبەسەرداگرتنی چاڵە نەوتەکانی کوردستانی رۆژاوا.
2 – رێگریکردن لە ناردنی سەرباز وچەک و پێداویستییەکانی جەنگ بۆ میلیشیاکانی ئێران لە سوریا و حیزبوڵلای لوبنان.
3 – لەپێناو زامنکردنی بەرهەمهێنان و پاراستنی چاڵەنەوتەکانی رۆژاوای کوردستان ، هەڵوێستێکی لاستیکی بەرامبەر بە هێزەکانی سوریای دیموکرات(هەسەدە) و دامەزراوەکانی خۆسەریی کورد دەنوێنێت، جارێک پشتتێکردن و دەمێک پشتگیریکردن.
