نەوزادى موهەندیس: کۆتا سەنگەرى بەرگریکردنى کورد لە یاساى نەوت و غازى داهاتوودا!

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

وەک دەوترێت کە کورد هەمیشە لەسەنگەرى بەرگریکردن و شۆڕش و جەنگە سەپێنراوەکان بەسەریدا هەمیشە سەرکەوتوو و جەنگاوەرى قارەمان بووە، بەڵام لەسەر مێزى گفتوگۆکان هەمیشە دەستبەتاڵ و فریودراو و دۆڕاو بووە. بەداخەوە دواى 32 ساڵ لە دەسەڵات و ئەزموونى حوکمڕانیەکى نیمچە سەربەخۆوە لە ئێستادا تەنها شەڕى مووچە و بەشە بودجەمانە و هەموو مەسەلە گرنگەکانى خاک و نەتەوە و قەوارەى هەرێم و دەسەڵاتەکان لە بیر چونەتەوە و هەریەکەمان لەسەرکردە و پارتە سیاسیەکان لەهەوڵى بەدەستخستنى پۆست و پلەى حیزبى بچووکى بێ ئەرزشداین و هەموو دیاردە دزێوەکانى ناوچەگەرى و عەشرەتگەرى و ئاینى و مەزهەبیمان تۆخکردۆتەوە بەسەر مەسەلەى نەتەوە و نیشیمان و ئازادى و سەربەخۆییدا.
لەنوێترین ململانێ ناڕەواکانیش بریتى بوو لە شەڕى لاوازکردن و بچووکرکردنەوە و دەستبادانى یەکترى لەسەر هەندێ مادەى یاساى بودجە کە لەکۆتایدا هەمووانیان بەزیانى هەرێمى کوردستان دەگەڕێتەوە. بەڕاى بەندە دواى تەسلیمکردنى مەلەفى نەوت بە بەغداد و کەمکردنەوەى دەسەڵاتەکانى پێشووترمان ئیدى ناتوانرێت کورد ببێتە بەرگریکارێکى باش و بەهێز، چونکە هەموو پایە بەهێزەکانى دەسەڵاتەکەى کە پارە و هێزى پێشمەرگەى هەبوو تەسلیمکردووە و دەسەڵاتیش بەو دوو هۆکارەوە دەتوانێت خۆڕابگرێت و مقاوەمەت بکات. ڕاستە دەسەڵاتى 32 ساڵەى ڕابووردوومان کامڵ و بێ کەموکوڕى نەبوو، بێ گەندەڵى و دادپەروەرى نەبوو، ڕاستە دەسەڵاتێکى شەفاف و یەکسانخواز و خەمخۆر نەبوو، ڕاستە دەسەڵاتێکى خاکى و خزمەتکارى ڕاستەقینەى سەر ڕاست نەبوو. بەڵام لەمێژووى سەد ساڵى خەباتى کوردایەتیدا لەهەرچوار پارچەکەى کوردستاندا دەسەڵاتێکى بێ وێنەى کوردى و خۆماڵى بوو بەهەموو کەموکوڕییەکانیەوە. بۆیە ئەرکى هەمووان بوو کە تا ئەو پەڕى بیپارێزین و ڕێگە لەبچووککردنەوە و نەمانى بگرین. ئێستاش نەچووە بچێت کورد پایە و خاڵى گرنگ و بەهێزى هەیە بۆ مانەوە و نە وڵاتانى ناوچەکە و نە زلهێزەکانى ئەوروپا و ئەمریکاش لێدەگەڕێن بە ئاسانى کورد بەدەردى سەدساڵى ڕابووردوو بچێتەوە.
بۆیە هەق نیە بێ هیوا بین، بەڵام خۆشباوەڕیش نەبین. چونکە پارێزگاریکردن لەم قەوارەیە کارى جدى و یەک و یەکگرتوویى ڕیزەکانى گەرەکە و دوورکروتنەوە لە خۆخۆرى و ملبادان و دەستشکانەوەى یەکترى گەرەکە، چونکە دەرکەوت هیچ حیزب و سەرکردەیەک گەر پشتیوانى و هێز لەهەموانەوە وەرنەگرێت تەنانت پڕۆژە و دروشمە نەتەوەییەکانیش نابێتە کۆکەرەوەى هەمووان نموونەش ڕێفراندۆمەکەى 25. 9. 2017بوو.
بۆیە ئەوەى لە پێش کورد ماوە بۆ مسۆگەرکردنى ئایندەمان و بەدەستخستنەوەى سەرچاوەیەکى گرنگى داهاتەکان بریتیە لەنەوت و غازى سروشتى هەرێمەکەمان. ئەوەش بەوەى کە کورد هەموو هەوڵێکى خۆى بدات لەکاتى نوسینەوە و داڕشتنى پڕۆژە یاساى نەوت و غازى ئایندەى عێراق جێگە و پێگەى یاسایى و دەستوورى و تەکنیکى و ماف و شایستەکانى هەرێمى کوردستان لە گەڕان و دۆزینەوە و وەبەرهێنان و دەرهێنان و فرۆشتن و پاڵاوتن و گواستنەوە و پیشەسازى پتڕۆکیمیاویات و دامەزراندنى کۆمپانیایەکى نەوت و غازى سروشتى هەرێم مسۆگەر بکات و بچەسپێنێت لەو یاسایەدا. چونکە ئەمە دوا هەل و چانس و سەنگەرى بەرگریکردنى ڕاستەقینەیە بۆ مسۆگەرکردنى مافەکانمان لەو سەروەت و سامانەى کەهەیە و خاڵى بەهێزى دەسەڵاتەکەشمانە و گەڕانەوەى سەنگ و قورسایمانە لەناوچەکە و دونیاشدا، چونکە هەمووان هەرێمێکى دەوڵەمەندیان دەوێت نەک هەژار و لێقەوماو.
هەربۆیە گەرەکە کە کورد هەر لەئێستاوە بەڕاوێژ لەگەڵ دۆست و شارەزاکانى بوارەکەدا لەناوخۆ و دەرەوەشدا بکەوێتە ڕاوێژ و پرس و ڕا و خۆئامادەکردن بۆ ئەو مەبەستە نەک وەکو هەموو جارەکانى تر لەکاتى بەفیڕۆچوودا فریابکەوین و بەپەلەپڕۆزێ دەسکەوتى کەموکورت و بچووک بەدەستبێنین و دواتریش بەیەکترى بفرۆشینەوە و گەلەکەشمانى پێ هەڵبخڵەتێنین.
ئەم یاساى نەوت و غازە گرنگ وگەورەیە چونکە دەبێتە هۆى ڕێکخستنەوەى بوار و کەرتى وزە بەنەوت و غازى سروشتى و هەموو سەرچاوە سروشتیەکانى ترەوە کە کوردستان لەهەموانیاندا دەوڵەمەندە و هەق وایە ماف و خاوەندارێتى بپارێزرێت.
ئەم یاسایە گرنگە بۆ ئایندەى چارەسەکردنى هەموو کێشە و گرفتەکانى نێوان هەرێم و بەغداد.
گرنگە بۆ ڕەخسانى هەلى کارى زۆر و گەورە بۆ گەنجانى کوردستان.
گرنگە بۆ پەرەپێدانى کەرتى وزە بەنەوت و غازى سروشتى و پیشەسازى پتڕۆکیمیاویات لە هەرێمدا.
گرنکە بۆ پشتیوانى و دروستکردنى پەیوەندى و پەیداکردنى دۆستى زیاتر بۆ مەسەلەکەمان بۆ ئایندە.
گرنگە بۆ ئاوەدانکردنەوەى وڵات و خۆشگەوزەرانکردنى هەرێمەکەمان.
گرنگە بۆ کەمکردنەوەى بێکارى و هەژارى و برسێتى.
گرنگە بۆ بەرزکردنەوەى هەموو ئاستەکانى خزمەتگوزاریەکان بۆ ئایندە.
بۆیە بەم هەموو گرنگیانەوە و زیاتریش دەبێت کورد بەو پەڕى تواناى و لێبڕانەوە هەوڵى سەنگەرگرتنى مقاوەمەت بدات لەنوسینەوەى ئەو یاسایەدا و بەیەک دەنگ و ڕەنگ و گوتار و کردارەوە و بەیەکویەکگرتویەوە بچێتە سەر مێزى گفتوگۆگان و ئەمجارە جیاواز لەهەموو جارەکانى ترى گفتوگۆکان پێویستە دەستکەوتى زیاتر بەدەستبێنن و ئیدى ئەو وتە زبرەى ڕابووردوو لە مێشک و هزرى هەمواندا بسڕینەوە کە کورد تواناى گفتوگۆکردن و دیپلۆماسیەتى نیە و هیچ کات سەرکەوتوو نابێت تیایاندا و بۆ ئەوەى ئێستا و ئایندەى هەرێمەکەمان و گەلەکەمان و نەوەى ئایندەش ڕۆشن و ڕوناک بکەینەوە نەک لەبەر دەسکەوتى حیزبى و ململانێى ناڕەوا هەموانیان لەدەستبدەین و ژیان و گوزەران و ئایندەیەکى توون وتاریکیان بۆ بەجێبهێڵین و ئەوانیش لەجیاتى ڕەحمەت نەفرەتمان لێبکەن.