دانا مەنمی: شکستی ئەمریکا لە ڕۆژهەڵاتی ناوەڕاست.
بەگشتی مرۆڤایەتی لە ڕۆژگاری ئەمڕۆدا لە ناو جەنگدایە، هەرگیز نە جەنگی ڕوسیا و ئۆکرانیا، یان فەلەستن و ئیسرائیل هەتا بەرەیەکی تریش کە چین و تایوانە ڕووکەش نین، بەڵکو ئەم جەنگانە جەنگی چەند زلهێزی سەرمایەداری جیهانیە بە ناوەکانی (ئەمریکا و چین و ڕوسیا )، بەڵام مەیدانی جەنگەکان شوین و وڵاتیکیترە. لەدوای ئەم جەنگانەوە ئەمریکا ناتوانیت هیزی یەکەم و بێ رکابەری جیهان بێت و شەریکی بۆ دروست بووە. شەریکەکانیش بە پلەی یەکەم ( روسیاو چین) ـە، روسیا لە دەیەی نەوەتەکانەوە نیگەرانی هەیە لە بەرفراوانبوونی هاوپەیمانی ناتۆ، چونکە هاوپەیمانیەتی ناتۆ ئەمریکا رابەرایەتی دەکات و ئامانجی ئەمریکاش ئابڵوقەدانی ڕوسیایە. چینیش تەحەمولی نەماوە لە بەرامبەر تایوان و سوپای ئەمریکا لە تایوان. ئەمریکا لە بەرامبەر چیندا سیاسەتیکی دووفاقی هەیە، لەلایەک دانی بەوەدا ناوە کە تایوان بەشێکە لە چین و لەلایەکیتریش ژێربەژێر هاوکاری سەربازی تایوان دەکات دژ بە چین. دەیەی حەفتاکان، تایوان خواستی هەبوو کە بگەرێتەوە سەر چین. بەڵام ولاتانی ئیمپریالیزم رێگربوون لەبەردەمیدا.
ئەم جەنگانەی کە ئیستا لەبەردەم مرۆڤایەتیدا قووت بوونەتەوە، ریشەیەکی قوڵی مێژویی و هۆکاری جیۆپۆلەتیکیان هەیە. روسیاو و چین وەک نیشتیمانێکی لە دەستچوو تەماشای ئۆکرانیا و تایوان دەکەن، یەکێک لە هۆکارەکانی جەنگی ئۆکرانیا پەیوەستە بە سروشتی سیستەمی جیهانیەوە کە ئەم سیستەمە ئیستا لە قۆناغی ڕاگوزەردایە و ئەگەری هەیە بەرەو دوو جەمسەری، یان فرە جەمسەری بڕوات. بۆیە هەریەک لە چین و روسیا دەیانەوێت لە سیستەمی نوێی جیهانیدا پێگەی بەهیزیان هەبیت و کاندیدبن بۆ بوون بە جەمسەر. رۆڵی ئەمریکا لە ناو ململانێکاندا ئەوەیە کە دەیەوێت لە ڕێگەی ئۆکرانیاو تایوانەوە ئامانج و خەونی روسیا و چین لەناوبەرێت و بەرگری لە سیستەمی جیهانی تاک جەمسەری بکات، هۆکارێکی تری جەنگەکان شەڕی بۆرسە و بانکەکانن لە ناو سیستەمی سەرمایەداریدا، چونکە هەموو دەوڵەتانی جیهان لە ژیر چەتری سەرمایەداریدا پێکەوە گریدراون و سیستەمەکەش بەشێکە لە ململانێی بلۆکردن و ئابڵوقەی ئابوری و ڕوبەڕوبونەوەی سەربازی کە ڕۆژ لە دوای ڕۆژ ئاسۆکانی ئابوری جیهانی لێڵتر دەبن.
لەناو ئەم پرۆسێسەدا قەبارەی داڕمانی ئەمریکاو هاوپەیمانەکانی لەهەموو بوارە سیاسی و ئابوری و سەربازی و ئایدۆلۆژیاکاندا تا دەگاتە بیرۆکەی پیرۆزی دەوڵەت و پاراستنی ئاسایشی نیشتیمانی و دیموکراسی و هەلبژاردن ساڵ بە ساڵ گەورەتر دەبێت، ئاستی ململانێکانی نیوان ئەمریکا و چین هیندە گەورەیە کە ئەمریکای ناچار کرد بە شکستەوە رۆژهەڵاتی ناوەڕاست بەجێبهێڵێت، هەر وەک چۆن لە ئەفغانستان گەرایەوە خاڵی سفرو دۆڕانێکی گەورەی سیاسی و سەربازی و مەعنەوی بۆ خۆی تۆمار کرد. لە وڵاتانی تری رۆژهەلاتی ناوەڕاست بە عێراقیشەوە ئەمریکا بە دۆڕاوی لێی هاتە دەرەوەو جیهانێک لە ماڵویرانی و ئاوارەبوون و کۆچ و گەندەڵی و بازرگانی ئەفیون و زاڵکردنی هەژموون و شوناسی ئاینی و تائیفی و عەشایری بۆ بەجێهێشتین.
پرۆژەی رۆژهەڵاتی ناوەراست کە ئەندازیارەکەی ئەمریکا بوو جەختی دەکردەوە لەوەی کە کۆی وڵاتانی عەرەبی (عێراق، سوریا، لوبنان، فەلەستین، تونس، یەمەن، میسر، لیبیا لەگەڵ تورکیا و ئیران و ئەفغانستان و پاکستان ) گۆڕانکاری تیدا دەکریت و ڕژێمەکانیان لەناو دەبرین و سۆزێکی جیهانی هەیە بۆ پاڵپشتی لە نەتەوە بندەستەکان و پرسی دیموکراسی و گەشەی ئابوری و بەهێزکردنی کۆمەلگای مەدەنی، بەڵام هیچی وانەبوو ئەمریکاو پرۆژەکەی لە رۆژهەڵاتی ناوەڕاست بە تەواوی شکستی خوارد. بەڵام هێزە نەیارەکانی ئەمریکاو هاوپەیمانەکانی لەهەموو کات بەهیزترن، دەرکەوتنەوەی ڕوسیا وەک هیزێکی زەبەلاحی سەرمایەداری سەربازی، هەژموونی ئابوری چین لە رۆژهەلاتی ناوەراست بەتایبەت لە سعودیەو ئیمارات و میسر و پاکستان و ئیران و تورکیا کۆی ولاتانی ئەفریقی و جیهانی عەرەبی. لەپاڵ ئەمەنەیشدا کێشەی ئیران و سوریا بەجێهێشتنی بۆ نادیار ئەمریکای ناچار کرد کە شکستەکانی لە رۆژهەلاتی ناوەراست قبوڵ بکات.
