عیماد عەلی: کوردستان و کاریگەریی شەرەکەی غەزە.
لێرە باس لە هەڵوێستی ئیسلامیەکان ناکەم و باش دەزانم بەردەوام قسەی خۆیان بە پێی پەیوەندیان لەگەڵ هەردوو تەرەفی شەرٍەکە و بەرژەوەندی و پێگە و فشارە عەقیدی و دابەشبونیان بەسەر وڵاتە زلهێزەکان لە لایەک و بیرکردنەوەیان لەوەدایە کە بەرهەمی هەر کردەوەیەک چەند دەچێتە گیرفانیانەوە، لە لایەکی دیکەوە هەڵوێستیان لەسەر ئەوە وستاوە کە خوێندنەوە هەمیشە تەسک مەودا و چۆنێتی بیرکردنەوەی لە رادەی تێگەیشتنیان لە ئاراستەی هاوکێشەی روودانی گۆرانکاری دەرئەنجامەکەی چەند بەرەو ئەوان رادەکێشێت بەرەو ئەوێ هەنگاو دەنێن. ئینجا با قسە لەسەر بارودۆخەکەی ئەمرٍۆ و کاریگەری ناراستەوخۆی ئەم شەرٍەی غەزە لەسەر کورد روون بکەینەوە. باری هەژاری کەرتی غەزە و ئەو فەرمانەی بۆ بەرپاکردنی ئەم شەرە لە هەر شوێنێکەوە هاتبێت خەڵکی ئەو ناوچەیە دەبنە قوربانی و شوێنەواری دوور مەودا و راستەوخۆی شەرەکە زیاتر لەوێ دەمێنێتەوە. هەڵوێستی گەلی فەلەستین هەرچیەک بوبێت لەسەر کورد، وەکو خەڵکی دڵپاک و مرۆڤ پەرست، کەسمان پێمان خۆش نیە رووداوەکە دەبێتە هۆکاری ماڵوێرانی و قاتو قرٍی و دەردەسەری بۆ گەلی فەلەستین و ئێمەش وەکو کورد میلەتێکی زیان پێگەیشتووی دەستی شەرٍین و تەنها خۆمان بێ ئەوەی کەس هەڵوێستێکی لەوبارەوە نواندبێ، یان زۆر دوژمان بوون و هەمیشە هەر خۆمان باجمان داوە و تەنانەت ئەوەی ئێستا زۆر کەس بۆی دەگرین بەبەردەوامی پاڵپشتی دوژمنەکانمان بوون.
ئێمە لەم کاتەدا چاوەروانی: 1- غەزە جگە لە یارمەتی دارایی دەرەکی هیچ سەرچاوەیەکی نیە و خەڵکی هەژار و نەبوو دەبنە سوتەمەنی و یاریکەرە سەرەکیەکانی وەک ئێران و ئەمریکا و تەنانەت روسیا و ئۆروپا لەدوورەوە قازانجی شەر دەچننەوە و باش دەزانین کە ئەوانیش گیرۆدەی دەستی هەر جەمسەرەکەن. 2- ئێران لەم شەرە گەورەترین لایەنە قازانج بکات و پێگە سیاسی و ئابووریەکەی زیاتر بەهێزتر دەکات و تارادەیەک و بۆ ماوەیەکی باش خۆی لەئابڵوەق و فشاری ئەمریکا رزگار دەکات( ئەگەر شەرێکی سەرتاسەری لە ناوچەکە روونەدات و هەر لایەنەو بگەرێتە سەر دۆخی خۆی). 3- رکابەری و ململانێی جەمسەرەکان توندتر دەبێت و ئەجێندا تایبەتیەکانی ئێران و ئەمریکا و هاوجەمسەرەکانیان توندتر دەبن ( باس لە هاوکێشە نهێنیەکانی ئەو دوو لایەنە ناکەم کە زۆر جار پێچەوانەی راوبۆچونە ئاشکراکانیان رەفتار دەکەن). 4- ڕۆڵی ئەو میلیشیا زۆرەی لە ناوچەکەدا هەن زیاتر دەبێت و جێگەی خۆیان دەگرن و ئەڵتەرناتیڤی دەسەڵاتی وڵاتەکانیان دەبن بۆ ئێران و توندوتۆڵتر دەبن و ئێران بە ئاسانی بەکاریان دەهێنێت. 5- ئامانجەکانی ئێران لە سەپاندنی ئەجێنداکانی ئاسانتر دەبێت( ئەگەر شەرٍی سەرتاسەری نەبێت و هەمووان بگەرٍێنەوە مەتەرێزی خۆیان). 6- هەر ئێران قازانج دەکات لە کەم کردنەوەی فشارەکانی وڵاتان بەهۆی بەرنامە ناوکیەکەیەوە. 7- دەستی سەرجەم حزبوڵا کان کراوە دەبێت و میلیشیاکان لە عیراق و لوبنان و یەمەن و ئەوانەی بە نهێنی کاری خۆیان لە بەحرەینیش دەکەن بارێکی تریان دەبێت، بە یەکلایی بونەوەی شەرٍەکە، داشی جەمسەری ئێرانی لە ناوچەکە بەرزتر و فراوانتی دەبێت. 8- ئێران دەتوانێت بە رێژەیەکی باش شکست بەو نزیکبونەوەی سعودیە و ئیسرائیل بێنێت و تاوەکو یەکلایینەوەی کەیسی چەکی ناوکی پشویەک بدات. ئەوەی دەمێنێتەو پێگەی کورد و کاریگەریی شەرٍەکەیە لەسەر پرسەکەی و رۆڵی کوردستان لە ناوچەکەدا: 1- کوردستان تا رادەیەکی نادیارە، ئاهێک بەبەریدا دێتەوە و دەتوانێت جوڵەیەکی سیاسی بکات،( بەڵام ناتەبایی و دابەشبونی لایەنەکان و نەبونی ئابووریەکی تۆکمە، ئەم ئەگەرەی لاواز کردووە). 2- هەلێکی باش دەبێت بۆ کورد یاری خۆی بکات لە ناوچەکە و گۆرٍان و ئاڵوگۆری جەمسەرگیری و لە ناوچەکە لە قازانجی خۆی بشکێنێتەوەێتەوە بە مەرجێک کورد بۆخۆی هەڵویٍستی روونی دەرنەخات و خۆی لە جەمسەرگیری توند بپارێزێت و چاوەرٍێی هەلی باشتر بکات بۆ جێبەجێکردنی هەڵەێستی راست و پێویست. لێرەدا مەبەستمان نیە کاریگەریە ورد و گرنگەکانی گۆرٍانکاری ناوچەکە لەسەر شەری ئۆکراین و هەڵوێستی روسیا و وڵاتانی ئەو جەمسەرە دەربخیەن لەبەر ئەوەی لەوەدا زۆر بۆچون و ئەگەری زۆر هەیە. بۆیە، دەبێت ئەوە بڵێین کە کورد هەلێکی باشی لەبەردەمدایە، بەڵام کەسمان متمانەمان بەم دەسەڵاتەی هەر دوو حزب نیە بیقۆزنەوە و نەیکەنە قوربانیی بەرژەوەندیە تەسکەکانی حزب و بنەماڵەکانیان و نەبنە داشی دامەی جەمسەرەکانیان.