بەهرۆز جەعفەر: دەنگدان بەرپرسیارێتی دەگەڕێنێتەوە بۆ هەموو کوردێکی ناوچە دابڕاوەکان.

بەهرۆز جەعفەر

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لەکۆتایی هەفتاکاندا مولازم جوامێر و هاوڕێکانی بە پێ دەچن بۆ بەغدا، بۆ ئەوەی لە شوێنێکدا بۆیان ڕێک بکەوێ سەدام حوسەین بکوژن! لەکاتێکدا سەدام هێشتا ئەنفالی نەکردبو، گازبارانی نەکردبو، تەعریب و تەرحیل بەو جۆرەی ئێستا نەگەیشتبوە ئەوسەری و ئەوپەڕی. کەچی ئێستا تەنها دەنگێکە (یەک دەنگ) کاتژمێرێک ناخایەنێت، مرۆڤی کورد لێی خەمساردە.
بە سەدان وتارو ڕەخنەی توندمان لەسەر نەبوونی ستراتیجێکی یەکگرتوی نیشتیمانیی بۆ کەرکوک لە دوای 2003 ەوە هەبوە، لەسەر ئەدای ناشیرینی دەستەڵاتی کوردی لەکەرکوک زۆرجار وە قسە هاتین و تووشی سەرئێشەی زۆریش بووین، ئێستا خۆشیان دەزانن کارێکی خراپ و ئەدایەکی ناشیرینیان کردوە، ئەمە با بەجێی خۆی بێ و دەنگدانیش بە جێی خۆی.
هەموو دەنگدەرێکی کەرکوک، هەموو کوردێک دەبێ ئەو ڕاستییە بزانێ کەرکوک سولەیمانی و هەولێر نییە، کەرکوک قووڵایی ستراتیجیی کوردستان و کوردەکانە، قووڵایی ئاسایش و ئارامی کوردو کوردستانیش بەندە بە کەرکوک و ئەو هێڵە درێژەی لە خانەقینەوە دەست پێدەکات تا تەلەعفەر. مولازم جوامێرەکان و لەیلا قاسمەکان لە ناو بەغدا لەبەردەم سمێڵی دوژمنی ئەو ڕۆژگارە-بەد-کارەدا هەڵپەڕکێیان دەکرد، ئێستا تیرۆریستێک بە عەباکەی سەرشانییەوە هاتوە لە ناو کەرکوکدا بە کەماڵی ئیسراحەت دەڵێ؛ کەرکوک عێراقییە و کوردەکانیش دەبێ وانە وەربگرن!
بۆ بیرهێنانەوە باشە؛ ئەگەر سبەی پارێزگارێکی کورد لە شارەکە دابندرێ، هەموو یەکێ لە ئێوە، وە ئێمە دەتوانین ڕەخنەی بکەین، پەلاماری بدەین، بێزاری بکەین، لەگەڵی دابنیشین، پێشنیارو پرۆژەی پێ بدەین. بەڵام پارێزگارێکی شۆڤێنی عەرەب دابندرێ؛ ئەو پەلامارت دەدا، نە دەتوانی پرۆژەو پێشنیاری بۆ بکەی، نە مافی ناڕەزایی دەربڕینیشت دەبێ.
پێویستە هەموو کوردێک، جگە لەخۆی عەرەبێک و تورکمانێکیش ڕازی بکات دەنگ بە کورد بدەن. بە پێی بەڵگەنامەی خودی” عوسبەتولئومەم”، وە خودی دەستەڵاتدارێتی عوسمانییەکان لەسەروبەندی یەکەمین جەنگی جیهانییدا “نەک کەرکوک، بەڵکو مووسڵ شارێکی کوردستانییە”. نابێ بەرپرسە کەرکوکییەکان، ئەوانەی دەشتی نەینەوا و تا خانەقین چیتر ناوچەکە بە جێبهێڵن و لە سلێمانی و هەولێر دابنیشن.
کاتێک لە کەرکوک دەنگ نادەیت، سبەینێ تەزویریش بکرێ مافی هیچ و تەیەکت نییە. کە دەنگ دەدەیت بەرپرسیارێتی دەخەیتە سەر کاندیدو لایەنە کوردییەکان کە بەدوای دەنگەکەتدا بچن.
کە تۆ دەنگ دەدەیت، سبەینێ مافی خۆتە هاوار و داوا بکەیت پارێزگارێکی کوردی- سەنگینی- دەستپاکی دوور لە حیزب و حیزبایەتی و کە پێشوتر ڕۆڵی دیاری نەبوە لە پرۆسەی سیاسیی کەرکوکدا ئەرکەکە بگرێتە ئەستۆ، پارێزگارێک بەشێک نەبوبێ لە دەنگە-دەنگی ڕابردووی کەرکوک دابندرێ.
پێویستە هەموو کوردێک چاوی لەسەر کەرکوک بێ و، هەموو دەنگدەرێکی کوردیش لە خانەقینەوە تا مووسڵ بچن دەنگ بدەن. بە هەزاران دۆنم زەوی کورد لەم چەند ساڵەدا داگیرکراون، زیاتر لە پەنجا پۆست لە سنوری پارێزگای کەرکوک لە کورد وەرگیراونەتەوە، کەمتر لە (4٪) چوار لەسەدی کۆمپانیای نەوتی باکور لە کەرکوک ئێستا کوردن، لە دوانزە ناحیە چواریان بەدەست کوردەوەن! لە بەغداوە بەدەیان لیست بە هەزاران عەرەب و تورکمانیان لە کەرکوک دامەزراندوە، بە دەگمەن ناوی کوردێکی تیابوە! تەنانەت بەهۆی دەنگ نە-دانەوە سەندیکای پزیشکانی ددانیش کەوتۆتە دەست عەرەب و تورکمان.
ئەگەرچی بارودۆخی دوای هەڵبژاردن بۆ کورد ئاڵۆزتر دەبێ (فاکت و ڕەخنەو ڕاستیی دیکە دەگوزەرێ و هەبوەو هەیە، ئێستا کاتی نییە). بۆ ئێستا ئەلف و بای ئیشەکە، ئەوەیە لە هەموو حاڵەتێکدا کوردو کوردستانیانی ناوچە دابڕاوەکان ئەوەی لەسەر شانیانە بە دەنگەکانیان جێبەجێی بکەن. ئەوەی لەو دوورەوە دانیشتوە و کەرکوک و خوارووی شارەکەی نەبینیوەو فەلسەفە لێ دەدا و، واقیعەکە نازانێ، هێشتا ئەو لە جادە حەولییەکەی کەرکوک مەرگی مێردمناڵە کوردەکەی نەبیستوە، چوونکە ئاڵایەکی بچووکی کوردستانی پێ بوو، حەشدەکان تەقەیان لێی کردو ژیانیان لێ سەندەوە. ئاخەر ئەو تا ئێستا قەت نەیدیوە باوک و دایکە ڕەنجدەرەکەی دەمەو ئێوارانێک سوپاو حەشد پێکەوە بدەن بەسەریدا، ئەو کاکەییەک نەبوە بیگرن و لایەک لە سمێڵەکەی بتاشن و سوکایەتی پێ بکەن، تا ئێستا بەسەریدا نەهاتوە برا گەورەکەی ساڵیكی ڕێک گەنم بچێنێ و دواتر ڕێگەی نەدەن بیدرۆرێتەوە!