سەردەشت محەمەد: چۆن ڕۆژی زمانی دایک بەرز ڕابگرین؟

سەردەشت محەمەد

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەمڕۆ ڕۆژی جیهانی زمانی دایکە، ڕۆژێک کە بەبڕوای من ئەگەر بۆ هەرگەل و نەتەوە و کۆمەڵگایەکی دیکە بەرزڕاگرتنی زۆر جێگەی گرنگی و بایەخ پێدان نەبێت، ئەوا بۆ گەلی کورد زۆر پێویست و گرنگە کە ئەو یادە زۆر بەرز و پیرۆز ڕابگرێت. چونکە ئەگەر بە مێژووی کورددا شۆڕببینەوە ئەوکات تێدەگەین هیچ وەخت و سەردەمێک نەبووە هێندەی ئێستا زمان و کەلتور و ڕۆشنبیری و خاک و سەروەری کورد لە ژێر مەترسی داگیرکاری و لەناوچوندا بێت.
ڕاستە مێژووی کورد پڕە لەداگیرکاری و لەناوبردن، بەڵام ئەوەی ئەم لەناوبردن و داگیرکاریانەی ئێستا لە ڕابردوو جودا دەکاتەوە ئەوەیە کە ئێستا خودی تاکی کورد بێئاگا خۆی پێشی داگیرکەران کەوتووە.
ئەگەر لەڕابردودا دەگیرکەران بەدوای داگیرکردن و دابەشکردنی خاک و نەهێشتنی هەستی نەتەوایەتی و لەناوبردنی کەلتور و زمانی کوردییەوە ببون و هەموهەوڵێکیان بۆ سەرخستنی پیلانەکانیان بوبێت، ئەوا ئێستا خودی تاکی کورد بێئاگا و بێ هەستکردن بەو مەترسیانە و خۆپاراستنیان لێیان سەرقاڵی جێ بەجێکردنی ئەو پیلانانەی دوژمنن، ئەوەی جێگەی مەترسییە جێبەجێکردنی ئەوپیلانانەش هەموی لەژێر ناوی بەرەوپێشچون و کرانەوەدا ئەنجامدەدرێت. هەربۆیە دەبینین یادێکی وەک ڤالانتاین کەنەک سودو قازانجی بۆ ئێمە نیە، بەڵکو کەلتور و خێزانی کوردیشی بەرەو لێکترازان و لەناوبردن بردووە. کەچی زۆر بەبایەخ تر و گرنگتر لە ڕۆژی جیهانی زمانی دایک لێی دەڕوانرێت و تەنانەت بەشێک لە میدیاکان زیاتر گرنگی پێدەدن.
قەبارەی مەترسییەکان لە سەر ناسنامەی ئێمەی کورد هێندە گەورەن ناتوانین بائاسانی مەزەندەیان بکەین، لە هەر دەروازە و ڕێگایەکەوە دەڕۆین دەبینین بە دەیان و سەدان پیلان بۆلەناوبردنمان لە بەردەماندا دانراوە، هەر ئەمەشە وامان لێدەکات کە بڵێین بەڵێ ڕۆژی زمانی دایک بۆ ئێمە لە هەموو یاد و ڕۆژێکی دیکە دەبێت بەرزتر ڕابگیرێت و دەبێت ڕۆشنبیران و خەمخۆرانی ئێمە پلانی باشتریان هەبێت بۆ بەرزڕاگرتنی ئەم یادە.
ناکرێت ئێمە ئەم یاددە لە ڕۆژێک و چەند سەعاتێکدا کۆتایی پێبهێنین، بەڵکو دەبێت بەرنامە و پرۆگرامی هەفتەیمان بۆئەم یادە هەبێت، دەکرێت هەرشار و شوێنێکی ئەم کوردستانە بکەین بە سەکۆیەک بۆپێشکەشکردنی دەیان بەرنامە لەسەر خستنەڕووی گرنگی پارێزگاری کردن لەزمان و کەلتورمان، چونکە ئەوی ئێمەی تائێستا ڕاگرتووە و لەنێو ئەم هەموو داگیرکەرەدا بەزیندویی هێشتونیەتییەوە زمانەکەمانە نەک ڕۆژی ڤالانتاین.