بەهرۆز جەعفەر: پێنوس نە نووسی.
حکومەتی هەرێم و دەستەڵاتدارە شیعییە- ئاڕاستەکراوەکانی بەغدا هەردوولایان بەشێکن لە ستەم، هیچ لایەکیان کار لە پێناو خۆشگوزەرانی هاوڵاتیان و حوکمی یاساو سەروەرکردنی ڕاستەقینەی تاک و خاکی عێراق ناکەن. هەردوو لایان بەشێکن لە گەندەڵێ.
تا ئەو شوێنەی دەست و قۆڵی یەکدی با دەدەن، ئیشی دەستەبژێر و ئەوانەی هزر دەهۆننەوە نییە توخنیان بکەوێ.
لە مانگی ئابی 2014 ەوە تا 16 ی ئۆکتۆبەری 2017 هەموو ڕۆژێک دوو حیزبە کوردییەکە ( سێ کەس و دوو دامەزراوەی کوردی ) هەموو ڕۆژێک 320 بۆ 350 هەزار بەرمیل نەوتیان لە (5) کێڵگەی نەوتی کەرکوک دەرکردوەو تاڵانیان کردوە (18٪) داهاتەکەشیان دەدا بە ئەردۆگان و نیزیکەکانی، لەو ماوەیەدا مانگانە بە بەردەوامی (500 بۆ 530) ملیۆن دۆلاریان دەستکەوتوە، لەکاتی خۆیدا ئەمەم زۆر وتوە؛ کە بێ ئەوەی تاکە یەک دینار و دۆلاری بخەنە سەرقاسەی گشتی هەرێمی کوردستان، یان هەرنەبێ خزمەتی ناو کەرکوکی پێ بکەن، تەنانەت تەنەکەی خۆڵێکیان بۆ شارەکە دابین نەکرد! ئایا ئەگەر ئێستا من بچم داکۆکی لە لایەنی هەرێمی کوردستان بکەم، چوونکە کوردن و کوردستان خاکی کوردانە، ئەمە نابێتە کورتهێنانی ئەخلاقی و کەرامەتی پێنوسەکەم ناشکێ؟
حەوت ساڵی ڕێک، سەدان پرۆپۆزەڵم بە گەورەو گچکەی ئەو حیزبە داوە بۆ لێکۆڵینەوەسازیی زانستی لە بواری بیناکردنەوەی ئاسایشی وزە، پرسی ئاو، هەمەچەشن کردنی سەرچاوە ئابورییەکان، هەستانەوەی کوردستان و… تادوایی. ئەوان خۆیان پێ خاوەنی کوردستانە و وادەزانن خەڵک دەبێ سواڵکەر و ئەوانیش هەر هەموو بە سەدان ماستاوچی و کوڕە بەعسی و کائینی کەللـەپوتەوە خاوەنی سەرو ژێری کوردستانن، ئێستا دوای ئەوەی هەزارجار خوێن لە گەرووم هات، خوێن بوو بە ئاو، دکتۆرام تەواو کردوەو مەرکەزی دیراساتی ستراتیجیم لە هەموو جێگەیەک خستەسەر پێ، هەرێمی کوردستان و ئەزموونەکەی تەنانەت حیسابی یەک کچی ناو کافێتریای شەوانەی کوڕی بەرپرسە دەرەجە دوو- سێ و چوارەکانی ئەوانی بۆ نەکردم، ئایا ئەوە کورت هێنانی ڕەوشتی و شکاندنی ئابرووی پێةوسەکەم نییە بچم لە میدیا دەرەکی و ناوەندە دەرەکییەکان بەرگری لەو هەرێمی کوردستانە بکەم، کە تیایدا دوو حیزب کوردو کوردستانیان لە پێش چاوی هەموو خەڵک قێزەون و نابووت کرد!؟
با.. بەرەوەڵڵا.. بۆیە باسی خۆم دەکەم، تا مافی وەم بدەیتێ بە تۆش بڵێم ئەگەر وات کرد، گومان بکە کە هەموو بەدڕەوشتییەکت لە دەست دێ. ئەو غرورەی دەستەڵاتی کوردیی دەستی دا بوویێ، ئەنجامەکەی کەوتنێکی ئازار بەخشە. ئەمە پسپۆڕی ناوێ؛ کیانێک دەستوری نەبێ، یاساو دادگای نەبێ، هێزی سەربازیی نەبێ، نیوەی مووچەخۆرەکانی هیچ خزمەت و کارێک پێشکەش نەکەن جگە لە قسەکردن و شەڕە جنێو و دەنگە- دەنگ، سیستەمی بەهێزی پەروەردەو تەندروستیی نەبێ، ئاسایشی ئەلیکترۆنی و خۆراکی لە مەترسی بێ، ڕۆژانە سەدان کیلۆ ماددەی هۆشبەری تیا بڵاو بێتەوە، مرۆڤە ماستاوچی و جاسووس و نەزانەکان تیایدا پلە دارەکان بن، بە چەندین فرسەخ و پەردە ئاقڵمەند و نیشتیمانپەروەرەکان خۆیان لێی بەدوور بگرن و هەست بەشەرمەزاری بکەن، خۆیان واتەنی گەندەڵی بوبێ بە کەلتور، ئەی بێ گومان سبەی، یان دوو سبەی ئەمە لە گیان دەکەوێ و بە سەدان دەستیش بیگری هەر دەبێ کەوتنەکەی بۆ مەردووم ڕابگەیەندرێ.
ئێ وایە، بە دەیان سەرکردەو ئاگامەند کە لەناو جەرگەی ئەم ستەمکارییەدان، خۆیان ددانیان پێداناوە کە ئەوەی ئەوان کردوویانە، قەت بەعس نەیتوانیوە بیکات. یەکێک تەنانەت دوو لاپەڕەی مێژووی کوردی خوێندبێتەوە، دەزانێ دەعەجانی وەکو قەیسی خەزعەلی و عەبادی و کەعبی و ئەو مارمێلکانەی لەناو دادگاکانی ئەمڕۆی عێراقدان، ناتوانن ئیرادەی هیچ کوردێک بشکێنن، ئەوان تەنها توانیویانە حوکمی شیعەگەرایی لە عێراقی دوای سەدامدا نابووت بکەن و متمانەی عێراقییە هاوزمانەکانیان بدۆڕێنن.
حەقە، زۆر حەقە زوو ددان بە شکستتدا بنرێ، سواری میترۆیەک بووی بە هەڵە لە وێستگەی یەکەم دابەزی باشترە، تا دوورکەویتەوە، باجی گەڕانەوە قورسترە.
