عه‌بدوڵا که‌ریم مه‌حمود: دوا فیشەک – بەشی یەکەم.
ده‌وڵه‌تی عێراق هەزاران رووداوی پڕ لەتراژیدیای لەم نیشتمانەدا بەرپا کردووە، هەر مەرگەساتێکیان رۆمانێکه، سیناریۆی فیلمێکه تۆمار نه‌کراوه. کام خانەوادە ئەندامێک، یاچەند ئەندامێکیان لەسێدارە نه‌دراوه، یا شوێن بزر نەکراوە، یا لە سەنگەری ڕووبەڕووبونەوەی بەرگری له خاک دواهەناسەی نەسپاردووە.
مام ڕەزا ئەحمەد قادر، یه‌کێکه له زیندانیانی سیاسیی و تێکۆشه‌ره ماندوە نمونییه‌کان، چه‌ند ساڵێک لەمەبەر به‌ده‌م ئازاری نە‌خۆشییه‌وه بیری له یاده‌وه‌رییه کاڵ و تاڵه‌کانی ئه‌وساو زه‌مه‌نی چه‌ق به‌ستوی دوای راپەرین و ئازادی و نمایشیی درۆ و فێڵ و بێ وه‌فایی و سیناریۆی خۆپەرستی ئه‌م ده‌سه‌ڵاتدارانه دەکردەوە، دەیوت جاران لە کاتی ئەشکەنجەدا بە جەلادەکانم دوت: هیچ نازانم. ئێستا، نازانم رووبکەمە کوێ؟ ، بە کام دەسەڵاتدار بڵێم ؟ بۆهەموو شکۆکانی ئەم نیشتمانەتان زیندەبە چاڵ کرد؟
مام ره‌زا لە 1958، پەیوەندی کردووە بە ڕێکخستنەکانی پارتی دیموکراتی کوردستانه‌وە، چەندان کاری پڕ لەزەحمەت و پڕ لە مەترسی ڕاپەڕاندووە. لە1975 لە ڕێگای ئیبراهیم ئەحمەدی وێنەگرەوە لەگەڕەکی شۆڕش، پەیوەندی کردووە بەکۆمه‌ڵه‌ی مارکسی لینینی کوردستانه‌وه.
تاریک و لێڵی بەیانی 17. 11. 1986 مەفرەزەیەک ئەمنی سلێمانی لەناکاو خۆیان کرد بەماڵی مام ڕەزادا، کون و قوژبنی ماڵەکەیان پشکنی بۆ ئەوەی دەستگیری بکەن، هیچیان چنگ ناکەوێت. دوای گەڕانەوەی ئەمنەکان ئاکۆی کوڕی بەخێرایی خۆی گەیاندە کارگەی جگەرەی سلێمانی بۆ ئەوەی هەواڵی ئەمنەکان بە باوکی بگەیەنێ، لەو کاتە ئەمنەکانیش گەیشینە ئەوێ، ئەمنەکان زانیان ئاکۆ بۆچی هاتووە، زۆر به‌توندی ئەشکەنجەیاندا.
مام ڕەزایان له کارگه دەسگیر کرد و ئەمنەکان پرسیاری (سامی جەمال)یان لێکرد بوو، وتبوی: نایناسم، بەشەق و زله دایان گرتەوە پێیان وتبوو: ئەى (ڕۆستەم و ڕێژین و ڕۆسۆ و ڕەنج و ڕەنجدەر، لەکوێن؟
وتبوی: نازانم.
وتبویان: ئێستا ئێمە پێت دەڵێین.
ئه‌منه‌کان هەردوو دەست و چاوەکانی مام ڕەزایان بەست، گواستیانەوە بۆ دائیرەی ئەمن، لەوێ پەڕۆکەی سەر چاویان کردەوە، لەو کاته‌دا کاک شێخ فەتاحیان هێنا، دواتر کاک کاوە بەکر مەحمودیان دەسگیر کرد، پاشان هەموویان گواستەوە بۆ ئەمنی سلێمانی. هەر کە گەیشتنە ناو گۆڕەپانەکەی ئەمن، ئەمنەکان بەشەق و زله و کێبل مام ڕەزایان داگرتەوە، زانیاریان لەپۆلی شەهید عەلی یە، لەکەرتی شەهید شیهاب.
وتیان: ئێمە زانیاری تەواومان لەسەر پۆلەکەتان لایە.
ڕەزا ئەحمەد ، لێپرسراوی 14مخەڕیبی، دەمانەوێ لەسەر زاری خۆت، زانیارییەکان ببیستین.
مام ڕەزا نکۆڵی لەو زانیارییانە کرد و ئاماژه‌ی به‌وه‌کرد: کە ئه‌منه‌کان ئەوانەیان ڕوو بەڕووکردمەوە، ئازارو ئەشکەنجەکانم لەبیر چوەوە بەلامەوە سەیربوو، چۆن ئەو هەموو زانیارییانە وردانەیان چنگ کەوتووە. لەو کاتەدا،(س و ج) وتیان:
مام رەزا ئەو نوسراوەی لامان بوو گیراوە، تۆش وەک ئێمە بەرگەی ئەشکەنجە ناگری ڕاستیەکان وەک ئێمە بڵێ: من هیچ نازانم، ئەوانەی کە ئێوە دەیڵن، هیچ پەیوەندییەکی بە منەوە نی یە.
هەر چوار ئەمنەکە (سەلام و فارس و حەسون و سالم) بەکێبل و شەق و زله مام ره‌زایان داگرتەوەو لەهۆش خۆی چوو، کاتێ بەئاگا هاتەوە، هەروازیان لێ نەدەهێنا
وتیان: هەموو زانیارییەکانمان لایە، دەزانین چەند ڕۆژێک لەمەوبەر کۆبونەوەتان کردووە، لەو کاتەدا(ج)یان هێنایە بەردەمی وتیان:
ئەمیش هەمان زانیاری(س)ی پێ وتوین، دەمانەوێ تۆش وەک (س)و(ج) ، قسەکانتان وەک یەک بێت، تۆش قسەکانی خۆتمان پێ بڵێ.
مام رەزا هەر نکۆڵی کرد.
سەلام هەڵچوو وتی: ئێستا بۆم هەڵواسن.
مام رەزایان،گەیاندیانە ژورێکی بچوک، خستیانە سەر مێزێک و ڕووتیان کرده‌وە، هەردوو دەستیان لەدواوە کەلەپچە کرد، لەدواوە بەقولاپێکدا هەڵیان واسی و مێزەکەیان لەژێر قاچی لابرد، مام رەزا وای دەزانی لەسێدارەی دەدەن. بەهەڵواسراوی کارەبایان لەئەندامە ناسکەکانی جەستەی دەدا، بەکێبل دایان گرته‌وە، لەهۆش خۆی چوو. کاتێ به‌ئاگا هاته‌وه جلی لەبەردا نەمابوو، دەستی برد بۆجلەکانی، ملازم فارس یەک شەقی لەدەستی دا وتی: چاوەکانت پڕن لەنهێنی، به‌لام نایدرکێنی.
مام رەزا وتی: ئەوەی ئه‌وان دەیڵێن، هەمووی درۆی هەڵبەستراوە، من پەیوەندیم بەهیچەوە نی یە، تەنیا فەرمانبەرێکی کارگەی جگەرەم.
دواتر مام رەزایان،گەیاندیانە ژوورێکی ئینفرادی، 4 ڕۆژ لەوێ بوو، بەدەم ئازارەوە زەمەنەکانی تەنیایی بەڕێ کرد، زیاتر بڕوای بەخۆی بوو کە تا دوا هەناسەی یەک وشە نەدرکێنێ.
