عەبدوڵا کەریم مەحمود: وڵاغ لوو گولەبارانیان کرد بە ماچ باران.

عەبدوڵا کەریم مەحمود

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لە چلەکاندا، لە نێوان دوو کەسی سەر بە بنەماڵەی ( گەڵاڵی) و بنەماڵەی ( کافرۆشی )، لە سەرىڕینی چەند لقە داڕێک لە نێوان رەزەکانیاندا، کێشە بەرپا بوو . عارف کەریم گەڵاڵی، خەنجەرێکی لە ( ساڵحی مام فەرەج کافرۆشی )دا، ئەویش بە ساچمەزەنەکەی برایەکەی عارف ی لەوێدا کوشت.
ئەم کارەساتە، بوو بە هۆی سەرهەڵدانی دوژمنایەتی لە نێوان گەڵاڵی و کافرۆشی، لە (1940- 1985)، ماوەی (35) ساڵ ، لە چەند رێکەوتێکدا هەردوو لایان، چەند کەسێکیان لە یەکتریی کوشت.
لە ناوەڕاستی ساڵی 1985 عەلی کوێخا عەبدوڵا ی گەڵاڵی و عوسمانی مام برایمی کافرۆشی، وەک دوو کەسایەتی دیار، لە رێکەوتێکدا لە نێوان گوندی( وڵاغلو و قامیش) بە یەک دەگەن، هەردوولایان دەمانچەکانیان لە بەر پشتوێنەکەیان دەرهێنا روویان کردە یەکتریی و لە بری ئەوەی گولەی شانەی دەمانچەکەیان لە جەستەی یەکتریی بەتاڵ بکەنەوە.
لە جوانترین هەڵوێستی جوامێریی و ئازایەتیدا، عەلی گەڵاڵی و عووسمان کافرۆشی پەنجەیان لە سەر پەلە پیتکەی دەمانچەکانیان لا برد، لە بری ئەوەی گولە بارانی یەکتریی بکەن، ماچ بارانی یەکترییان کرد.

لەوێ دا . بە یەکترییان وت:
ئەو هەڵانەی روویان داوە ناگەڕێنەوە، با ئێمە لە ئێستاوە هەڵەکان بسڕینەوە، وانەیەکی نوێ فێری نەوەکانمان بکەین، لە بری ئەوەی گولە بارانی یەکتریی بکەن، با وەک ئێمەماچ بارانی یەکتریی بکەن.

سەرچاوە:
ئەم زانیاریانەم لە کوێخا عەلی ساڵح و هەڵکەوت عەبدوڵا قادر.
گوندی وڵاغلو سەربە ناحیەی گاپپێڵۆنی قەزای ماوەتی شارباژیرە، لە دۆڵیکدایە چیای بەرزی حەسەن بەگ و گۆجارو بەردەسپیان دەورەی داوە، کەوتوەتە نیوان گوندەکانی (کونە ماسیی و گاپیڵۆن و باڵخ و گەڕەدێ و گەورەدێ و قامیش و دۆڵبێشک و گەڵاڵە)، 40کم لە شاری سلێمانی یەوە دوورە. ئەم گوندە لە دوو تیرەی سەرەکی گەڵاڵی و کافرۆشی پێک هاتوون.
لە 1977دا ، 136خانوو ، 146 خانەوادەو 579 کەس بوو، لە 1978 دوای راگواستنی گوندەکانی سنوور، لە 1981بوو بە مەرز، بە 270ماڵ جارێکی تر ئاوەدان کرایەوە.
لە دوای شەڕی قەیوان – ماوەت لە ساڵی 1986 گوندەکە خاپوورکرا و خەڵکەکەی روویان کردە شاری سلێمانی، دوای راپەرین ئاوەدان کرایەوە، تا 2000، 150ماڵی تا دەژیا.
گوندێکی باخدارە، بە رەزوباخی چوالە و سماق، 8 کانی و کارێزی تیایە،کێڵگەکانی مین رێژ کراوە، تا ئێستا 15 شەهیدو 35 کەم ئەندام ی مینیان هەیە.
(گوندی وڵاغ لوو) بە هەڵوێستە جوامێریی و ئازایەتیەکەی (عەلی کوێخا عەبدوڵلا ی گەڵاڵی و عوسمان مام برایم )، هەموو ئەو رق و تۆڵەو تۆڵە کردنەوە و کارەساتی کوشتن و دوژمنایەتیان لە رەگەوە سڕییەوە، لە وڵاغلوی برایەتی و ئاشتیدا، لەو کاتەوە وەک یەک بنەماڵە و یەک خانەوادە و ویەک خوێن و براو کەس و کاری یەکتریی دەژین.