سەردەشت محەمەد: گەڕانەوە بۆ شاخ..

سەردەشت محەمەد

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

گەڕانەوە بۆ شاخ لە تێڕوانینی ئێمەوە گەڕانەوەیە بۆ خاڵی سفر، گەڕانەوەیە بۆ ئەو کات و سەردەمی کە ئێمە وەک میللەتی کورد خاوەنی هیچ نەبوین، تەنانەت نەمان دەتوانی خوێندنەوە بۆ سبەینێی خۆمان بکەین و نەمان دەزانی سبەینێ چیمان بەسەردێت، گەڕانەوە بۆشاخ گەڕانەوەیە بۆ ئەو ساتەوەختەی کە ژیانمان بریتی بوو لە برسێتی و ڕاودونان و خۆشاردنەوە.

ئێستا و دوایی 33 ساڵ لە ئازادبونی باشووری کوردستان، لە بری پێشکەوتن و سەرکەوتن بەسەر کۆسپ و ئاستەنگەکانی بەردەمان کەچی هەنگاوەکانمان بەئاراستەی گەڕانەوەمانە بۆ شاخ، دوای ئەم هەموساڵە کەچی ململانێی نێوان هێز و پارتە سیاسییەکان لە باشووری کوردستان دۆخەی بەجۆرێک ئاڵۆز کردووە تەنانەت شیکەرەوە سیاسییەکانیش ناتوانن پێمان بڵێن بارودۆخی کوردستان، سبەینێ بەرەو کوێ دەڕوات.

پاش 33 ساڵ لە حکومڕانی هەرێمی کوردستان، لە لایەن هێز و پارتەسیاسیەکانەوە نەک هەنگاوێک بەرەوپێشچونمان بەخۆوە نەبینیووە تانانەت ئەم نمایشە ناشازەی ئێمە ترسی خستۆتە دڵی پارچەکانی دیکەی کوردستانیشەوە کە نەتوانن وەک پێویست خەبات لەپێناوی سەربەخۆبونی خۆیاندا بکەن، چونکە دەترسن دەرئەنجامی خەبات و قوربانیدانەکانیانوەک ئێمە بەهەدەر بڕوات و هەمان چارەنوسی ئێمەیان هەبێت.

پاش ئەم هەموو ساڵە لە خەبات و ماندووبون و قوربانیدانەی خەڵکی کوردستان، کە دەبو ئێستا هاوڵاتیانی هەرێمی کوردستان لە سایەی ئەم هێز و لایەنە کوردیانە و لە کوردستانێکی دەوڵەمەند بە نەوت و ئاو و خاکی بەپیت و دەوڵەمەند بە دەرامەتی سروشتی ژێرخاک و سەرخاک لەژیانێکی شاهانەدا ژیانیان بەسەرببردایە، ژیانێک کە هەموو تاڵاو و تاریکییەکانی سەردەمی شاخیان بیرچوبایەتەوە، کەچی ئەوەتا ڕۆژ لەدوایی ڕۆژ دەگەڕێنەینەوە بۆ سەردەمی شاخ، سەردەمێک کە جگە لە مەرگ ئومێدی ژیانمان نەبوو.
کەی ڕەوایە ڕژانی خوێنی هەزاران پیر و گەنج و لاو و سوتانی جەرگی هەزاران دایک و باوک، بەرهەمەکەی بەردەوامیدان بێت بە ململانێی سیاسی و قوڵبونەوەی قەیرانی دارایی و تێکچونی شیرازەی خێزان و کۆمەڵگا و پەرتەوازبوونی مییللەت و دابەشبوونی شەقامی کوردی بەسەر دووبەرەی هەمیشەی دژبەیەک.و سڕینەوەی کولتور پێشوازیکردن بێت لە هێزی داگیر بۆئەوەی هێرش بکاتە سەر خاک و خەڵکی کوردستان؟

ئەوەی ئێمە لەم دۆخە ڕزگاردەکات، ئەوەی مێژوو زمان و کولتور و خاک و خەڵکمان لە لەناوچوون دەپارزێت بەخۆداچونەوەی ئەو هێزانەیە کە لەم قۆناغەدا بەرپرسیارێتی ئەم حکومەتەیان لە ئەستۆدایە، ئەگەر ئەو هێزانە بە خۆیاندا نەچنەوە، ئەوا دەرفەتێک لە بەردەم خەڵکدایە بۆ ئەوەی ناچاریان بکەن بەخۆیاندا بچنەوە، ئەویش سزادانیانە لەم هەڵبژاردنەدا کە بڕیارە لە داهاتوویەکی نزیکدا ئەنجام بدرێت، ئەگەر نا ئەوە دەبێت دەست بەرداری ژیانی شار بین و بەیەکجاری بگەڕێینەوە بۆشاخ، گەڕانەوەش بۆ شاخ واتا گەڕانەوەیە بۆ خاڵی سفر.