نەوزادی موھەندیس: پارت و گروپە سیاسیە نوێکان و ئایندەی حوکمڕانی ھەرێم.

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئاشکرایە دیاردەی حیزبایەتی وەک دیاردەیەکی سیاسی و ئازادی ڕاوبۆچوون و کاری سیاسی و ھەڵوێست دیاردەیەکی ئاسایی و پێکھێنەرێکی سەرەکیشە لە بونیادی کۆمەڵایەتی کۆمەڵگا مرۆڤایەتیەکاندا، چونکە کۆمەڵگا مرۆڤایەتیەکان لە چەندین چین و توێژی جیاواز پێکھاتوون لە ڕووی نەتەوە و ئاین و مەزھەب و ناوچە و کەلتورەوە،کەھەریەکەشیان خاوەنی باکگراوندی تایبەت بەخۆیانن و خواست و ئیڕادەی جیاوازیشیان ھەیە بۆ وەدیھێنانی ئامانجی چین و توێژەکانیان. جا حیزبی سیاسیش، یان یانە کەلتوری و ڕۆشنبیریەکان جێگەی ئاسایی گردبونەوە و لێکنزیکبونەوەی بیروڕاو و ھەڵوێست و گوتارە ھاوبەش و لێکنزیکەکانی چین و توێژەکانن بۆ زیاتر خۆڕێکخستن و لێکتێگەیشتن و موتوربەکردنی بیروڕا جیاوازەکان و ڕێکخستنیان لە بەرنامە و فۆڕمێکی دیاریکراودا کە ھەموان لەسەریان کۆکبن و کاریش بکەن بۆ وەدیھێنانیان.
بەم شێوەیە دیاردەی حیزبایەتی لەلایەک مایەی وشیاری و وشیارکردنەوەی چین و توێژە جیاوازەکانی کۆمەڵگایە و لەلایەکی تریشەوە وێسگەیەکی گرنگە بۆ دابەشبوون و کۆبونەوەی چین و توێژەکانیشە لەگەڵ یەکدا گەر لەسەر بنەما ڕاستودروستەکانی دیموکراتی و ئازادیەکان و کاری پێکەوەی و خزمەتکردنی کۆمەڵگا و گۆڕانی پۆزەتیڤ و خۆشگوزەرانی و پێشکەوتنی کۆمەڵگاکان بێت. بەڵام گەلێک لە حیزبە سیاسیە کلاسیکی و لە ئێستاشدا ئاڕاستەی کار و گوتاری سیاسیان ھێندەی بۆ تۆخکردنەوەی ڕقوکین و جیاکاری و تۆخکردنەوەی دەمارگیری نەتەوەیی و ئاینی و مەزھەبی و ناوچەگەریە نیوھێندە لە پێناو بەرژەوەندی گشتی کۆمەڵگادا کارناکەن، ھێندەی بونەتە ھۆکاری لێکترازان و لێک ھەڵوەشاندنەوەی ڕیزەکانی کۆمەڵگاکان نەبونەتە ھۆکاری لێکنزیکبونەوەی ئاشتی و تەبایی کۆمەڵایەتی. بۆیە بە ھەق دیاردەی فرە حیزبی و دامەزراندن و دروستکردنی پارتی سیاسی نوێ لەلایەن کەسانێک کە نەڕابووردویەکی سیاسی دیار و نە کاریزمایەکی بەھێز و بەناوبانگی ناو کۆمەڵگا و نە کارەکتەرێکی کاریگەری ئابوری و بازرگانی و کۆمەڵایەتی و کەلتوریش نین،ھۆکارێکن بۆ تەنھا گردبونەوەیەکی نا ڕێکخراوی بێ بەرنامە و دیدی سیاسی و ئابوری و کۆمەڵایەتی و ئەمنی و کەلتوری ڕوون و دوورمەودا بۆ خزمەتکردنی کۆمەڵگا، بەڵکو ئەوەی لە دونیا و ناوچەکە و بەتایبەتیش عێراق و ھەرێمی کوردستاندا دەبینرێت بریتیە لە پاشاگەردانیەکی سیاسی و تێکەڵکردنی لاپەڕەکان و تاودانە بۆ دەسکەوتی مادی و ئابوری و وەدەستھێنانی پلەو پۆست و ئیمتیازاتەکانە بۆ دەستەیەکی دیاریکراو لە سەرکردایەتی ئەو حیزبانەدا.
ئەوەتا لەلایەن کۆمسیۆنی باڵای ھەڵبژاردنەکانی عێراقەوە کە سەرپەرشتی ھەڵبژاردنی پەڕلەمانی کوردستان دەکات ڕاگەیەنراوە کە 236حیزب و کیانی سیاسی و ھاوپەیمانی و تاکە کەس ناونوسکراون بۆ بەشداریکردن لە ھەڵبژاردنەکەدا و کۆی پاڵێوراوانی تاکە کەسی (سەربەخۆ)و لیستی حیزب و کیان و ھاوپەیمانێتیەکان و کۆتای پێکھاتەکان گەیشتۆتە 1198 پاڵێوراو تەنھا بۆ 100کورسی پەڕلەمانی کوردستان بۆ خولی شەشەم، ئەوەی جێگەی سەرنج و تێڕامانە ئەوەیە لەو ژمارەیەش تەنھا دوو ھاوپەیمانی پێکھێنراون کە ئەوانیش لاواز و بێ کاریگەرن لەنێوان چەند پارتێکی بچوکدا. جا گەر ئەمە ئاماژەیەک بێت بۆ ڕاستیەک ئەوا ئاماژەیە بۆ ئەوەی کە ھەموو ئەو حیزب و سەرکردە سیاسیانەی کوردستان ھێندە دوورن لە یەکەوە لەڕووی بەرنامەی کار و پلان و گوتار و دیدی سیاسیانەوە کە ناتوانن پێکەوە کاربکەن و لێکنزیکببنەوە،کەئەمەش بۆخۆی بەڵاو و کارەساتێکی ترسناک و مەترسیدارە بۆ ئێستا و ئایندەی یەکڕیزی و تەبایی و بنەمای پێکەوەکارکردن لەداھاتوودا. چونکە کۆمەڵگای کوردەواری زیاتر لەھەموو کاتێک لە ئێستادا پێویستی بە یەک ڕیزی و تەبایی و کاری پێکەوەیی و دانوسان و گفتوگۆی برایانە ھەیە، نیوھێندە پێویستی بە زۆری و بۆری لە دامەزراندنی حیزبی سیاسیدا نیە، ھەربۆیە بوونی ئەو ژمارە زۆرەی پارتە سیاسیەکان کە زۆرینەیان مێژوو و ڕابووردووی کاری سیاسی و دامەزراندنیان ھێندە نوێیە کە خاوەنی ھیچ ڕابووردوو شانازیەکی ئەوتۆنین کە ھاوڵاتیانی ھەرێمەکەمان لەسەر کار و کردەوەکانیان ھەڵیانبسەنگێنێت و دەنگیان پێبدات.
لەکاتێکدا عێراق و ناوچەکە و ھەرێمەکەشمان لە دووڕیانێکی مەترسیداری یەکلاکەرەوەدان بەھۆی ئاڵوگۆڕە خێرا و ئاڵنگاریە گەورەکان و مەترسیە شۆکھێنەرەکان کە ھەموانیان بە ئاڕاستەی ھەڵایسانی جەنگێکی گەورەی ماڵوێرانکەرن لەناوچەکەدا کە دوور نیە تەڕ و وشک پێکەوە بسوتێنێت، جا لە کات و ساتێکی ئاوھادا کۆمەڵگەی کوردەواری لەھەموو کات زیاتر پێویستی بە یەکڕیزی و تەبایی نێوماڵەکەی خۆی ھەیە ئەوەش بەکاری پێکەوەیی و لێکتێگەیشتن دەبێت نەک جودایی و دوورکەوتنەوە لەکار و گوتاردا. بۆیە گەر دیاردەی فرە حیزبی لەوڵاتانی پێشکەوتوودا مایەی وەدیھێنانی خواست و ویستەکانی جەماوەر و شەقام بێت و لەپێناو خۆشگوزەرانی ھاوڵاتیانیاندا تەواو بێت، ئەوا بە پێچەوانەوە لەھەرێمی کوردستاندا کە نەدەوڵەتە و نەسەقامگیری سیاسی و ئابوری و ئەمنی و کۆمەڵایەتی تیایدا جێگیرە و نەخاوەن سەروەری و سەربەخۆیی خۆیەتی، ئەوا بەدڵنیایی دەبێتە مایەی نیگەرانی و خەم و پەژارە و لێکترازانی زیاتر، چونکە ئەوان پێکەوە ناتوانن و نەیانتوانیە لەماوەی 33ساڵی ڕابووردووی ئەم حوکمڕانیەدا ببنە خاوەنی بڕیاری سیاسی سەربەخۆی کوردانە و نەیانتوانیەوە ببنە ئەزمون و نموونەیەکی جوان و گەشەکردوو و سەقامگیر لەناوچەکدا و نەیانتوانیوە خزمەتگوزاریە سەرەکیەکان بۆ ھاوڵاتیان دابینبکەن و نەیاتوانیوە ببنە جێگە متمانەی زۆرینەی ھاوڵاتیان کە تەنھا ڕێژەی خوار لە 30% بەشداری دەنگدان و ھەڵبژاردن کراوە لە ڕابووردووداو نەیانتوانیوە بنەماکانی ئازادیەکان و دادپەروەری کۆمەڵایەتی و یەکسانی و وەکویەکی و خۆشگوزەرانی بۆ ھەموان بێ جیاوازی دابینبکەن، ئایا دەتوانن بەم ھەموو ڕاو و مینبەر و سەکۆ و حیزبی سیاسی بێ ڕابووردوو بێ مێژوو بێ پلانێکی زانستی سیاسی ببنە فریادڕەسی ئەم دۆخ و قۆناغە پڕ مەترسی و قەیراناویە؟
بۆیە ئەم دیاردەی فرە حیزبی سیاسی زۆر و زەوەندەی کوردستان ھێندەی مایەی ترس و دڵەڕاوکێیە نیوھێندە مایەی دڵئارامی و گەشبینی وگەشەوپێشکەوتن و ھوشیاری و ھوشیاربونەوەی کۆمەڵگا ناگەیەنن،چونکە زۆرینەیان پێویستی و زەرورەتی قۆناغەکە نەیھێناونەتە بوون، بەڵکو تەنھا حەز و خولیای دەسەڵات و دەوڵەمەندبوون و دەستخستنی پلەو پۆست و ئیمتیازاتەکان پاڵنەری سەرەکی دروستبوون و لەدایکبونیانە. ئاشکراشە ئەم جۆرە حیزبانە لەماوەیەکی کورتدا دەپوکێنەوە و لێکھەڵدەوشێنەوە، چونکە بناغە و بنەمایەکی کۆنکرێتی جەماوەری و سیاسی ڕاستەقینەیان نیە و تەنھا بۆ ماوەیەکی کاتی ھاتوون نەک بۆ مانەوە وبەمەش لەزیان زیاتر ھیچ سوودێک بەھوشیاری وگەشەو پێشکەوتنی کۆمەڵگا ناگەیەنن.