عه‌بدوڵا که‌ریم مه‌حمود: له قۆچکه تاشییه‌وه بۆ حه‌فر – بەشی سێیەم و کۆتایی.
ده‌لاکه کۆنه‌کانی سلێمانی
له‌سه‌ره‌تای سه‌ده‌ی بیسته‌م دا، چه‌ندان ده‌لاک له سلێمانیدا ناسراوبوون، وه‌ک: ( وه‌ستا که‌ریم ی ده‌لاک )، له‌سه‌فه‌ر به‌له‌ک له‌وڵاتی شام فێری سەرتاشین بوو، دوای خۆی ( حه‌مه ساڵح ی کوڕی ) بوو به سه‌رتاش، دوکانه‌که‌ی له گومرگه سووتاوەکە بوو، دوای ئەوانیش (وه‌ستا عه‌بدوڵا ) و (وه‌ستا ئه‌مین) و ( وه‌ستا محێدین ). ئه‌م سێ برایه کوڕی (وه‌ستا محه‌مه‌د سلێمان )بوون.
له‌سه‌رده‌می عوسمانییه‌کاندا، له به‌رحه‌وزه‌وشکه‌که‌دا ده‌لاک بوون.
(وه‌ستا حسێن ) و ( وه‌ستا قادر عه‌زیز) و (وه‌ستا عه‌بدوڵڵا قوربانی ) و (وه‌ستا فه‌ره‌جی مارف عه‌مبه‌ر) و (وه‌ستا یونس) و ( وه‌ستا حاجی مه‌لا تۆفیق) و (حاجی مه‌حمودی ریش) و (حاجی سابیری که‌رکوکی) و (وه‌ستا عه‌بۆ لی دەلاک) و ئه‌مین سابیر) و (مه‌جید سابیر ) و (باوه تۆفیق) و وه‌ستا جه‌لال ) و (وه‌ستا گه‌ربێتی ئه‌رمه‌نی) و (وه‌ستا سه‌لامی ده‌لاک) و وه‌ستا که‌ریم ئاغا ) و (وه‌ستا ئه‌حمه‌دی وه‌ستا مه‌حمود ) و (که‌ریم ره‌سوڵ) و ( حاجی عارف ) و ( سه‌ید خه‌لیل ) و (وه‌ستا شه‌وکه‌ت) و ( حه‌مه‌ی عه‌لی ده‌لاک ) و ( ئه‌مجه‌د ئیسماعیل ) و (عومه‌ر ساڵح )،(حه‌مه فه‌ره‌ج قادر) و (وه‌ستا قاله‌ی نه‌عه و…. هتد.
گودیله
له سه‌ره‌تای چله‌کانه‌وه تا شه‌سته‌کان، باوی گودیله بوو، بریتی بوو ( له تاشینی قژی هه‌ر چوار ده‌وری سه‌ر، ته‌نیا له به‌شی پێشه‌وه‌ی سه‌ر، تۆپه‌ڵێک قژ به ناوچه‌وانی) دا ده‌هێڵرێته‌وه بۆ جوانی.
قۆچکه تاش
ده‌لاکه‌کانی جاران کڵاوێک، یا جامۆلکه‌یه کیان، له‌سه‌ر سه‌ری ئه‌و که‌سه داده‌نا که سه‌ریان بۆ ده‌تاشی، دواتر چوارده‌وری کڵاو جانه‌که‌یان به گویزان ده‌تاشی، بۆ ئه‌وه‌ی قژ نه‌چێته پشت ملی و سه‌ر گوێچکه‌کانی، تۆپه‌ڵه قژی ناو کڵاو جامه‌که ده‌هێڵرایه‌وه‌و نه‌ده‌تاشرا، به‌م شێوه قژتاشینه‌یان ده‌وت (قۆچکه تاش)ی، ئێستا ئه‌م جۆره سه‌رتاشینه له ناو گه‌نجه‌کاندا باوه پێی ده‌ڵێن ( حفر)، واته ته‌نک کردنی چوار ده‌وری سه‌ری سه‌رتاشراو .
سفر
ئه‌م جۆره سه‌رتاشینه، له‌سه‌رەتای شه‌سته‌کانه‌وه تا کۆتایی 1975 په‌یڕه‌وی ده‌کرا، به گویزان پاک هه‌موو قژی سه‌ره‌که‌یان ده‌تاشی، قژی پێوه نادەما، پێ ی دەوترا (سفر)، ئێستاش زۆر که‌س به به‌رده‌وامی قژیان سفر ده‌که‌ن.
سکۆب
له‌سه‌ره‌تای شه‌سته‌کان، سه‌رتاشینی سکۆب سه‌ری هه‌ڵدا، شێوه‌یه‌کی جوان و سه‌رنج راکێشه‌ری هه‌بوو، قژه‌که به‌رز ده‌کرایه‌وه بۆ سه‌ره‌وه، چوارده‌وره‌که‌ی که‌مێک کورت ده‌کرایه‌وه، رۆنی تایبه‌تی لێ ده‌درا، تا بریقه‌ی بێت.
قژ درێژ کردنه‌وه‌و خه‌نافس
له‌سه‌ره‌تای 1976 دا، جۆره سه‌رتاشینێک داهات، قژ به درێژا یی ده‌هێڵرایه‌وه له گه‌ڵ خه‌نافس، هێشتنه‌وه‌ی هه‌ردوو لاجان بوو، له‌سه‌ره‌وه بۆ خواره‌وه ی گوێچکه، هه‌روه‌کو قالۆنجه، چۆن شاخه‌کانی به‌رز ده‌کاته‌وه، خه‌نافس واته شێوه‌ی قالۆنچه، ئه‌و سه‌رده‌مانه هه‌ردوو زلف درێژ ده‌کرایه‌وه تاسه‌ر کراس. باوی کراسی ملیوان، پان و درێژ بوو لە گەڵ( پابتۆڵی شارستۆن )*، خوارەوەی پانۆڵە کە فروان بوو، ستایڵێکی ئەمەریکی بوو، تایبەت بوو بە سەمای (جارڵسن )لە شاری چارڵسن)، لە ولایەتی (کارولینای باشوور، لە 1960 شارستۆن بوو بە باو لە ئەمەریکا، لە 1972 گروپی ( ئایا )،گۆرانیەکیان پێشکەش کرد، بە شارستۆنەوە لە سوید، شارستۆن لە ئەوروپا بڵاو بوەو لەوێشەوگەیشتە عێراق و کورستان.
له دوای ناوه‌ڕاستی حه‌فتاکان، تا کۆتایی هه‌شتاکان، سه‌رتاشین و خاوکردنه‌وەی قژ، بوو به مۆدیل، سه‌رتاش به ڤێروه یا به مجفیفه قژی ئه‌و که‌سانەیان خاو ده‌کردوه، بۆ ئه‌وه‌ی له شێوه‌ی قژی لولی راسته‌و خۆدا، شۆڕ ببێته‌وه بۆ خواره‌وه بۆ سه‌ر گوێچکه‌کانی، به‌م جۆره سه‌رتاشینه ده‌وترا قژدرێژ کردنه‌وه.
حه‌فر
ئێستا مۆدیلی قۆچکه تاشی جاران، به شێوه‌یه‌کی نوێ ترو جوانتر، به رێکخستنی مجه‌فیفه و رۆن لێدان سه‌ری هه‌ڵداوه‌ته‌وه، بۆ ئه‌وه‌ی قژه‌که به جوانی بوه‌ستێ، پێی ده‌ڵێن (حفر ).
سه‌رچاوه
عه‌بدوڵڵا که‌ریم مه‌حمود: سه‌رتاشی له‌قۆچکه تاشی جارانه‌وه بۆ حه‌فری ئێستا، هه‌رێمی کوردستان، ژماره 212، پێنج شه‌ممه ، 8 / 6 / 2000، ل٤.
* بە پانتۆڵی شارستۆن ، گوڵان ،میدیا .
* ئه‌م نوسینه‌و چه‌ندان نوسین لێره‌دا ، بڵاوی ده‌که‌مه‌وه ، هەمووی گەڕان و ماندوونوون و بەداداچوونە ، زۆر پێوه‌یان ماندوو بووم ، هه‌ندێ که‌سی نه فس نزم ، ده‌یدزن و ده‌یکه‌ن به نوسینی خۆیان ، بەناوی خۆیانەوە بڵاوی دەکەنەوە دز زۆر بووە ، چه‌ندان نوسینیان دزیوم
- بابەتەکانی تری عەبدوڵا کەریم مەحمود
-
عه‌بدوڵا که‌ریم مه‌حمود: له قۆچکه تاشییه‌وه بۆ حه‌فر – بەشی دووەم.
- -
عه‌بدوڵا که‌ریم مه‌حمود: له قۆچکه تاشییه‌وه بۆ حه‌فر.
- -
عەبدوڵا کەریم مەحمود: مه‌رگی خانه‌واده‌یه‌ک.
- All Posts