بەختیار نامیق و سەرکەوتی جیهاز: هاوسەنگی هێز و ڕێککەوتننامەی دەباشان.
بەدرێژای حوکمی پارتی و یەکێتی لە شاخەوە بۆ شار حکومێکی تەواو حیزبی بوە، لە سەر ستەیج بە پێگەی جوگرافیا و سایکۆلۆژیای کۆمەڵاتی یەکێتی بە حیزبی نوێ و ڕادیکاڵ و کراوە ناسراوە، ئەوەش دەزانین سلێمانی وەک هەولێر و دهۆک نیە و حیزبێک ناتوانێ تەواو کۆنتڕۆڵی بکات و هەمو حیزبەکان لە سلێمانیەوە دروست بون بە پارتیشەوە، کە دەڵێین؛ یەکێتی ڕابەر بوە لە قۆناغێکدا لە خۆوە نەبوە، دوای ئاشبەتاڵ یەکێتی لەسەردەستی یەکگرتنی باڵەکان و کۆمەڵێک ڕۆشنبیری سیاسی توانی ببێتە حیزبی ژمارە یەک و کۆمەڵە ببێتە داینەمۆی ئەم حیزبە و دەریایەک خوێنی لە پێناو ئامانجەکانیدا داوە، بەڵام لە قۆناغی خەباتی شاردا هەرێم بە حوکمی دابەش بون بەسەر وڵاتە زلهێزە ناوچەییەکاندا بو بە دوو ئیدارە و دوو هێز و دوو زۆن، لەبەر ئەوەی بەرژەوەندی باڵای گرێدراوی وڵاتە زلهێزەکانی هەرێمایەتی و جیهانی لەسەر ئەم جوگرافیایە دروست بوبو، ڕێککەوتننامەی ستراتیژی لەدایک بو، کە دابەشکاری بو لە نێوان نمایندەی هێزە ناوچەییەکان و گڵۆپی سەوزی وڵاتە زلهێزەکان، ڕێککەوتننامەی ستراتیژی ئەگەر کۆتایی هێنابێت بە شەڕی خوێن و براکوژی ئەوا هەرێمی بردە ناو زەلکاوێکی تر کە دوو زۆنی و دووئیدارەیی و دوو چەک و دنیایەک گەندەڵی، گۆڕان کە لەناو هەناوی یەکێتیەوە لەسەر دەستی کاریگەرترین سەرکردە و ڕۆشنبیرترین سیاسی دروست دەبێ، بەدەر لە ئامانجە گشتیەکانی دوو ئامانجی سەرەکی هەبو گۆڕینی ڕەسمی ڕێککەوتننامەی ستراتیژی لە دوو حیزبییەوە بۆ نیشتمانی و بونی دەستور، لەسەر ئەم بنەمایە دەیویست گوشاری مەدەنی و شەقام دروست بکات تا یەکێتی و پارتی ناچار بکات بە ڕیفۆرمی گشتی، بەڵام بەهۆی گوشارە دەرەکییەکانەوە و نەخۆشکەوتنی مام جەلالەوە و هەندێ سازشی یەکێتی بۆ پارتی هاوسەنگی هێز لە نێوان دوو زۆن و دوو حیزبدا تێکچو لە بەرژەوەندی پارتی بو، تا ئەو ئاستەی هەژمونی پارتی لە سنوری دەستەڵاتەکانی بە پێی ڕێککەوتننامەی ستراتیژی تەواو گەورەتر بو، لە دوای کاک نەوشیروان و مام جەلال دۆخی ناوخۆی هەردوو حیزب بەتەواوی تێک چو پارتی زۆرسودی لەم بۆشاییە وەرگرت، لەلای هاوڵاتیش گۆڕان و یەکێتی متمانەیان نەما و بەتایبەت گۆڕان سفر بویەوە و کێرڤی یەکێتی تەواو دابەزی.
خۆ ئەگەر بچینەوە سەر دوا قۆناغی تەمەنی مام جەلال و کاک نەوشیروان ئەوا بۆ ڕاستکردنەوەی باڵانسی هێز لە ڕێی ڕێککەوتننامەی دەباشانەوە هەوڵیاندا لە ئاستەکانی ( ستراتیژ و سەربازی و ئابوری و خاک و دەستور و هاوسەنگی هێز ) ببنە یەک ئاراستە و کاری هاوبەش بکرێ و زەمینە خۆش بکرێت بۆ یەکگرتنەوە، ئەگەر چی لەم کۆتاییانەدا لیستی هاوبەش هەبو، بەڵام نەگەیشتە ئەنجامێکی باش و بە ڕەخنە لەیەکتر کۆتایی هاتو گۆڕان زەرەرمەندی یەکەم بو ، وە نەتونرا هاوسەنگی هێز بگێڕنەوە.
لە ئێستادا دوای ئەوەی بە هەوڵی بافڵ تاڵەبانی دوای تێکچونی زۆر خراپی ناو یەکێتی و بونی بە دەیان باڵ و گرووپەوە هەنگاو بە هەنگاو بەرەو باشتر دەچێ و خەریکە دەگاتە ئاستی ڕێککردنەوەی هاوسەنگی هێز و لەبەرامبەردا گۆڕان لە دۆخێکی زۆر خراپدایە، گەر یەکێتی وا وێنا بکەین کە یەکێتیەکی نوێیە و بافڵ توانیویەتی موتربەی یەکێتیەکی کاریگەر لەسەر قەدی یەکێتیە کۆنەکە سەوزبکاتەوە، ئەوا گرنگە لە زۆنی سەوزدا کۆ دەنگیەک هەبێت بۆ پشتوانی بافڵ و گەڕاندنەوەی هاوسەنگی هێز و ڕێککەوتننامەی ستراتیژی نوێبکرێتەوە و بە پێی سەردەم و خوێنی دوەمی سەرکردەکان و خواستی گشتی و ئێستای دۆخی هەرێم بنوسرێتەوە و ڕێککەوتنی لەسەر بکرێت.
بۆ ئەم ئامانجە گرنگە یەکێتی پڕۆژەیەکی نیشتمانی گشتگیری هەبێت ئەگەر یەکگرتنەوەش نەبێت ئەوا دەنگە سەربەخۆ و حیزبەکانی تر ببن بەبەشێک لە هێری بافڵ و یەکێتی بۆ گەڕاندنەوەی هاوسەنگی هێز.
گۆڕان ڕێککەوتننامەی دەباشانی هەیە لەگەڵ یەکێتی و مێژوی هاوبەش و خوێنی هاوبەش و جوگرافیای هاوبەش و ئیدارەی هاوبەشیان هەیە، دەکرێ بە گەڕانەوە بە ئەم ڕێککەوتنە جارێکی تر فۆرمێک بدۆزرێتەوە بۆ کاری هاوبەش بۆ گەڕاندنەوەی هاوسەنگی هێز بە بەرنامە و پلان و ستراتیژێکی نیشتمانیانە کار کردن لەسەر هەر سێ دەستەڵاتە سەرکیەکە و لەسەرو هەموشیانەوە دەستور، بە تایبەت ئێستا لەبەردەم خۆئامادەکردنداین بۆ هەڵبژاردنەکانی عێراق.
