حه‌مه‌ئازاد به‌رزنجی: وانه‌یه‌ک له ئێستا و 10 دی له مێژوو.
ده‌توانرێ ژیان و گوزه‌رانی دکتاتۆره‌کان و نه‌وه‌کانیان له مێژودا و چۆنیه‌تی گرتنه ده‌ستی ده‌سه‌ڵات و چۆنیه‌تی به‌ڕیوه‌بردنی وڵات و له کۆتایشدا، چۆنیه‌تی له ده‌ستدانی ئه‌و ده‌سه‌ڵاته، ببنه وانه‌یه‌ک، بۆ ده‌سه‌ڵاتداران و باڵا کاربه‌ده‌ستانی ئێستای وڵاته‌کان له هه‌ر گۆشه‌یه‌کی ئه‌م جیهانه‌دا بن.
هه‌ر یه‌که‌یان چۆن خاوه‌نی چه‌ک و جبه‌خانه‌ی زۆر و هێزی تایبه‌ت به خۆیان و خاوه‌ن پاره‌ی نه‌قدی و موڵکی تایبه‌ت و ڤێلاو پاپۆڕ و خشڵ و چه‌نده‌ها سه‌رچاوه‌ی خۆشگوزه‌رانی دیکه بون.
وه وه‌ک ده‌رده‌که‌وێ هیج کاتی ئه‌م دکتاتۆرانه، نه په‌ندیان له میژووه‌وه وه‌رگرتوه، نه گوێیان بۆ ئامۆژگاری دۆست و هاوڕێکانیان گرتوه، وه نه هیچ کاتێ حسابیان بۆ به‌رامبه‌ر و رکابه‌ر و ئۆپۆزسیۆنه‌کانیان کردوه. زۆر له‌وه زیاتر به چاوی سوک و بێ توانایش تێیان ڕوانیون. وه هه‌ر بیریان له‌وه کردۆته‌وه چۆن سه‌رکوتیان بکه‌ن و زیاتر بیانچه‌وسیننه‌وه و زیاتر پێشێلی مافه‌کانیان بکه‌ن و له‌ناویان به‌رن. له ڕیگه‌ی میدیا به‌کرێگیراوه‌کانیان و. هه‌ڵخه‌ڵه‌تێنه‌ره‌کانیانه‌وه، راستیه‌کان ئاوه‌ژوبکه‌نه‌وه و وا پیشان بده‌ن، که برسیه‌کان، برسی نین و درۆ ده‌که‌ن تێرن. خه‌ڵکه که‌مده‌رامه‌ته‌کان خۆیان به‌به‌شی خۆیان ناڕازین و خۆیان کارناکه‌ن، بۆیه بژیوی ژیانی خۆیان بۆ دابین ناکرێ. ئه‌و قوتی رۆژانه‌نه‌یه‌ی په‌یدای ده‌که‌ن به زۆری ده‌زانن و ئه‌ویش هه‌ر به پاداشت و زه‌کاتی خۆیانی داده‌نین. به‌لام گوزه‌ران و خۆشرابواردنی نه‌وه‌و، نه‌وه‌ی نه‌وه‌کانی خۆیان و، ئه‌و پله‌وپایه‌یه‌ی پێیان به‌خشیون، ئه‌و ده‌سکه‌وته مۆڵه‌ی لێیانه‌وه ده‌ستیان ده‌که‌وێ، به هه‌قی شه‌رعی خۆیانی داده‌نێن.
ده‌گێڕنه‌وه جارێ، فریشته‌ی ڕۆحکێشان ( ئیزرائیل)، دێ بۆلای ده‌وڵه‌مه‌ندێکی چاوچنۆکی زۆردار و، پێی ده‌ڵێ، بۆ ڕۆحکێشانت هاتوم، به‌ڵام فرسه‌تیکی دیت ده‌ده‌ینه‌وه، به‌و مه‌رجه‌ی خۆت چاککه‌یت، واز له‌کرده‌وه‌ی خراپ بهێنی و له گونا‌حه‌کانیشت خۆش ده‌بین. سه‌رت ده‌ده‌ینه‌وه به‌ڵام ئه‌مه دوا ئاگاداریمانه. دو دراوسێشی ده‌بێ له خۆی خراپتر. هه‌ردوکیان به ماوه‌یه‌ک یه‌ک له دوای یه‌ک، پێش ئه‌م ئیزرائیل ڕۆحیان ده‌کێشی و ده‌مرن. پاش ئه‌و ماوه‌یه ئیزرائیل دێته‌وه بۆلای. پێی ده‌ڵێ کاتی ڕۆحکێشانته و کرده‌وه‌کانیشت هه‌ر چاک نه‌کرد و هه‌ر له‌سه‌ر به‌د ڕه‌فتاری به‌رده‌وام بویت و به سیفه‌تی بێباوه‌ری و خراپه‌کار ڕۆحت ده‌کێشین. زۆر ده‌پاڕێته‌وه ماوه‌ی زیاده‌ی دیکه ی پێبده‌نه‌وه، بێ سود ده‌بێ . به ئیزرایئل ده‌ڵێ یه‌کجار ئاگادارت کردوم بۆ بۆم ناکه‌ی به‌دو . پێی ده‌ڵێ بۆم کردی به دو بۆم کردی به سێ تۆ هه‌ر گوێت نه‌گرت. ده‌ڵێ: کوا. ده‌ڵێ: یه‌که‌م جار خۆم هاتم، دوه‌م جار دراوسێی ده‌سته ڕاستم ڕۆح کێشا، تۆ هه‌ر نه‌تخسته سه‌رخۆت. سێهه‌م جار دراوسێی ده‌سته‌چه‌پم ڕۆح کێشا تۆ وانه‌ت هه‌ر لێوه‌رنه‌گرت و سوار سه‌ری خۆت ببویت و گوێت له‌که‌س نه‌ده‌گرت.
وا دیاره ئه‌م براده‌رانه‌ی لای خۆشمان. سه‌ره‌ڕای ئه‌وه‌ی ئیزرائیل، چه‌ند جارێ سه‌ری لێداون، که‌چی ده‌رس له‌هیچ وانه‌یه‌ک وه‌رناگرن. ئه‌وه وانه‌کانی دوێنێ: ئه‌وه قه‌زافی له لیبیا، ئه‌وه حوسنی موباره‌ک له میسر، ئه‌وه سه‌دام حسینی مه‌ڕ خۆمان له ئێراق. ئه‌مه‌یش وانه‌که‌ی ئێستاو ئه‌مڕۆمان که هاڵاوی لێهه‌ڵده‌سێ: وا دراوسێکه‌ی ده‌سته‌چه‌پیشمان، کاک به‌شار له 8/12/ 2024 دوای زیاتر له په‌نجاساڵ له حوکم و ده‌سه‌لاتی دکتاتۆری کۆتایی پێ هێنرا و ده‌ریان په‌ڕاند. ئه‌مان هێشتا هه‌ر سوار سه‌ری خۆیان بون و گوێ له‌هیچ که‌سێ ناگرن. چوارده‌ورمان هه‌موی ده‌کوڵێ، ئێوه‌ش به‌هه‌زاڕ شه‌ڕه‌شه‌ق تا ڕازی بون که هه‌ڵبژاردن بکرێ. هه‌ڵبژاردنیش کراو زۆرینه‌شن، هه‌ر به‌خه‌یاڵتانا نا‌یه‌ت و حکومه‌ت پێک ناهێنن. میله‌ته‌که‌تان برسیه‌و و برسی تری ده‌که‌ن. موچه له به‌غداوه هاتووه‌و وه‌ریناگرن و دابه‌شی ناکه‌ن. ده‌ڵێن ( عه‌به نوقصانی ) هه‌یه. باشه ئێوه شت له کێ ده‌شارنه‌وه هه‌مو تاکێکی ئه‌م میله‌ته و هه‌مو فه‌رمانبه‌رێکی ئاسایی ده‌زانێ که سه‌رچاوه‌ی داهاته ناوخۆییه‌کانتان چه‌نده زۆره، و داهاتی نه‌وتی دزراویش هه‌ر به مفتی ده‌خۆن. خه‌ڵک زۆر له‌سه‌ر چزه‌و ئێوه هه‌ر بێباکن. ناڕه‌زایی ده‌رده‌بڕن و رێپێوان ده‌که‌ن ده‌لێن هیچ نییه کۆمه‌ڵێ مامۆستاو فه‌رمانبه‌ری که‌من. باش بزانن، هه‌ر ده‌وه‌نه و ده‌بێ به دار. گه‌ر ئه‌م ڕێپێوانانه گه‌شه‌ی سه‌ندو بو به ناڕه‌زایی و ، دوایی په‌لامارو خۆراپسکان و ڕاپه‌ڕین. ئه‌و‌سا چی ده‌که‌ن . حاڵتان له حاڵی به‌شار زیاتر نه‌بێ که‌متر نابێ. بۆ به‌شار خاوه‌نی تانک و تۆپ و هێزی تایبه‌ت نه‌بو، به‌شار ئێران و ڕوسیاشی له پشت نه بو. به‌ڵام که ڕمیا، ڕمیاو که‌وت، که‌س فریای نه‌که‌وت. ئه‌ی ئێوه به کێوه ده‌نازانن. پشتان به کێ قایم کردوه، له‌وه‌نده زیاتر میله‌ته‌که‌تان برسی مه‌که‌ن. له‌وه زیاتر توانای میله‌ته‌که‌تان به‌که‌م مه‌زانن. که زۆر لێتان بێزار بون و ته‌لی ته‌حه‌مول پچڕا، وه‌ده‌رتان ده‌نێن.
